mohabbat ibtida mein kuchh nahin malum hoti hai

mohabbat ibtidā meñ kuchh nahīñ ma.alūm hotī hai

magar phir dushman-e-īmān-o-dīñ ma.alūm hotī hai

vajūd-e-zāt aks-e-ālam-e-hastī se hai sābit

tirī sūrat hī sūrat-āfrīñ ma.alūm hotī hai

maiñ milnā chāhtā huuñ tujh se aise tuur par jā kar

jahāñ terī tajallī bhī nahīñ ma.alūm hotī hai

ga.e ham dair se ka.abe magar ye kah ke phir aa.e

ki terī shakl kuchh achchhī vahīñ ma.alūm hotī hai

tirī barq-e-tajallī ke chalan ham se koī pūchhe

chamaktī hai kahīñ lekin kahīñ ma.alūm hotī hai

tirā e.ajāz-e-qudrat hai ki hastī kī numā.ish meñ

zamāne-bhar ko shakl apnī hasīñ ma.alūm hotī hai

dil-e-'muztar' ḳhudā ke vāste is se kināra kar

mohabbat dushman-e-jān-e-hazīñ ma.alūm hotī hai

mohabbat ibtida mein kuchh nahin malum hoti hai

magar phir dushman-e-iman-o-din malum hoti hai

wajud-e-zat aks-e-alam-e-hasti se hai sabit

teri surat hi surat-afrin malum hoti hai

main milna chahta hun tujh se aise tur par ja kar

jahan teri tajalli bhi nahin malum hoti hai

gae hum dair se kabe magar ye kah ke phir aae

ki teri shakl kuchh achchhi wahin malum hoti hai

teri barq-e-tajalli ke chalan hum se koi puchhe

chamakti hai kahin lekin kahin malum hoti hai

tera eajaz-e-qudrat hai ki hasti ki numaish mein

zamane-bhar ko shakl apni hasin malum hoti hai

dil-e-'muztar' KHuda ke waste is se kinara kar

mohabbat dushman-e-jaan-e-hazin malum hoti hai