mohabbat jalwa-e-ruKHsar bhi hai

mohabbat jalva-e-ruḳhsār bhī hai

mohabbat kākul-e-ḳhamdār bhī hai

tajallī māne-e-dīdār bhī hai

nazar kī raah meñ dīvār bhī hai

vo saada hī nahīñ purkār bhī hai

ba-kār-e-ḳhvesh jo hushyār bhī hai

bashar daanā bhī hai hushyār bhī hai

magar mast-e-mai-e-pindār bhī hai

mohabbat māne-e-iz.hār bhī hai

mohabbat mā.il-e-guftār bhī hai

mirī tasḳhīr-e-dil meñ kār-farmā

tirī shīrīnī-e-guftār bhī hai

bashar par haiñ jahāñ pābandiyāñ aur

asīr-e-sub.ha-o-zunnār bhī hai

zamāna sulh-e-dushman hai azal se

zamāna barsar-e-paikār bhī hai

shafaq meñ gul meñ jām-e-arġhavāñ meñ

mirī rangīnī-e-ash.ār bhī hai

mohabbat kā maza kyā pūchhte ho

mohabbat pyaar bhī takrār bhī hai

fareb-e-ḳhāmushī bhī dil ne khāyā

halāk-e-shoḳhī-e-guftār bhī hai

jise kahte haiñ sab duniyā meñ jiinā

bahut āsāñ bahut dushvār bhī hai

jo nekī kar ke dariyā burd kar de

kahīñ vo sāhab-e-īsār bhī hai

tamannā sar-bulandī kī to bar-haq

magar kuchh jauhar-e-kirdār bhī hai

jahāñ haiñ aur asbāb-e-tanazzul

hamārī pastī-e-me.ār bhī hai

use majmua-e-azdād kahiye

bashar majbūr bhī muḳhtār bhī hai

vahī insāñ jo hai ġhaflat pe maa.il

rahīn-e-jazba-e-bedār bhī hai

adab ko istaqāmat baḳhshne meñ

mirī barnā.ī-e-afkār bhī hai

ise sho.ala bhī kahiye ye hai shabnam

mohabbat nuur bhī hai naar bhī hai

tumhārī muntazir muddat se 'tālib'

chaman meñ nargis-e-bīmār bhī hai

mohabbat jalwa-e-ruKHsar bhi hai

mohabbat kakul-e-KHamdar bhi hai

tajalli mane-e-didar bhi hai

nazar ki rah mein diwar bhi hai

wo sada hi nahin purkar bhi hai

ba-kar-e-KHwesh jo hushyar bhi hai

bashar dana bhi hai hushyar bhi hai

magar mast-e-mai-e-pindar bhi hai

mohabbat mane-e-izhaar bhi hai

mohabbat mail-e-guftar bhi hai

meri tasKHir-e-dil mein kar-farma

teri shirini-e-guftar bhi hai

bashar par hain jahan pabandiyan aur

asir-e-subha-o-zunnar bhi hai

zamana sulh-e-dushman hai azal se

zamana barsar-e-paikar bhi hai

shafaq mein gul mein jam-e-arghawan mein

meri rangini-e-ashaar bhi hai

mohabbat ka maza kya puchhte ho

mohabbat pyar bhi takrar bhi hai

fareb-e-KHamushi bhi dil ne khaya

halak-e-shoKHi-e-guftar bhi hai

jise kahte hain sab duniya mein jina

bahut aasan bahut dushwar bhi hai

jo neki kar ke dariya burd kar de

kahin wo sahab-e-isar bhi hai

tamanna sar-bulandi ki to bar-haq

magar kuchh jauhar-e-kirdar bhi hai

jahan hain aur asbab-e-tanazzul

hamari pasti-e-mear bhi hai

use majmua-e-azdad kahiye

bashar majbur bhi muKHtar bhi hai

wahi insan jo hai ghaflat pe mail

rahin-e-jazba-e-bedar bhi hai

adab ko istaqamat baKHshne mein

meri barnai-e-afkar bhi hai

ise shoala bhi kahiye ye hai shabnam

mohabbat nur bhi hai nar bhi hai

tumhaari muntazir muddat se 'talib'

chaman mein nargis-e-bimar bhi hai