mohabbat jo rakhti asar zindagi bhar

mohabbat jo rakhtī asar zindagī bhar

nahīñ rūThtā ham-safar zindagī bhar

hai kaisī ye ulfat ke tū ne kabhī bhī

na rakkhī mirī kuchh ḳhabar zindagī bhar

luTāte rahe vo jahāñ meñ mohabbat

hameñ hī kiyā dar-ba-dar zindagī bhar

ḳhulāsa bayāñ merī āñkheñ kareñgī

uThāyā nahīñ maiñ ne sar zindagī bhar

kiyā qatl hāthoñ se jazboñ kā maiñ ne

jalā kar ye ḳhūn-e-jigar zindagī bhar

banānā jo chāhā thā hāthoñ se maiñ ne

banā hī na paa.ī vo ghar zindagī bhar

hai jo kuchh bhī paayā use kho na deñ ham

hamesha rahā dil meñ Dar zindagī bhar

'adāvat mohabbat se behtar hī hogī

rakhī tum ne qaa.em agar zindagī bhar

sitam Dhā rahe haiñ mohabbat jatā kar

hai un kā ye husn-e-nazar zindagī bhar

mohabbat jo rakhti asar zindagi bhar

nahin ruThta ham-safar zindagi bhar

hai kaisi ye ulfat ke tu ne kabhi bhi

na rakkhi meri kuchh KHabar zindagi bhar

luTate rahe wo jahan mein mohabbat

hamein hi kiya dar-ba-dar zindagi bhar

KHulasa bayan meri aankhen karengi

uThaya nahin main ne sar zindagi bhar

kiya qatl hathon se jazbon ka main ne

jala kar ye KHun-e-jigar zindagi bhar

banana jo chaha tha hathon se main ne

bana hi na pai wo ghar zindagi bhar

hai jo kuchh bhi paya use kho na den hum

hamesha raha dil mein Dar zindagi bhar

'adawat mohabbat se behtar hi hogi

rakhi tum ne qaem agar zindagi bhar

sitam Dha rahe hain mohabbat jata kar

hai un ka ye husn-e-nazar zindagi bhar