mohabbat ka diya aise bujha tha

mohabbat kā diyā aise bujhā thā

havā ke dosh par rakkhā huā thā

sitāra TuuT kar jab bhī girā thā

ajab dhaḌkā sā dil ko lag gayā thā

ajab vahshat thī tere aa.ine meñ

jahāñ har aks hī TuuTā huā thā

lipaT kar chāñd se rone lagā thā

sitāra TuuT kar Dar sā gayā thā

use thī chāñd tāroñ kī talab aur

hamāre paas to bas ik diyā thā

hazāroñ rañg the ik aarzū ke

magar mujh ko to us ne ḳhud chunā thā

kisī ahd-e-vafā kā haath thāme

koī ik moḌ par rotā rahā thā

kisī ko dosh kyā deñ Dūbne kā

bhañvar jo paañv se lipTā huā thā

ajab be-faiz thī ye bhī mohabbat

bahāroñ meñ ḳhizāñ kā ruup sā thā

udhar se dhuup ko aane nā dūñgā

tujhe kuchh yaad hai tū ne kahā thā

vahī tishna-labī āñkhoñ meñ sahrā

vahī mizhgāñ pe ik aañsū dharā thā

mohabbat ka diya aise bujha tha

hawa ke dosh par rakkha hua tha

sitara TuT kar jab bhi gira tha

ajab dhaDka sa dil ko lag gaya tha

ajab wahshat thi tere aaine mein

jahan har aks hi TuTa hua tha

lipaT kar chand se rone laga tha

sitara TuT kar Dar sa gaya tha

use thi chand taron ki talab aur

hamare pas to bas ek diya tha

hazaron rang the ek aarzu ke

magar mujh ko to us ne KHud chuna tha

kisi ahd-e-wafa ka hath thame

koi ek moD par rota raha tha

kisi ko dosh kya den Dubne ka

bhanwar jo panw se lipTa hua tha

ajab be-faiz thi ye bhi mohabbat

bahaaron mein KHizan ka rup sa tha

udhar se dhup ko aane na dunga

tujhe kuchh yaad hai tu ne kaha tha

wahi tishna-labi aankhon mein sahra

wahi mizhgan pe ek aansu dhara tha