mohabbat ka diya jal kar bujha aise nahin hota

mohabbat kā diyā jal kar bujhā aise nahīñ hotā

to jaarī zulmatoñ kā silsila aise nahīñ hotā

hue ho jaise tum koī ḳhafā aise nahīñ hotā

koī bhī zindagī bhar ko judā aise nahīñ hotā

lahū kā rang bharnā paḌtā hai lafzoñ ke ḳhākoñ meñ

mukammal qissa-e-ahd-e-vafā aise nahīñ hotā

baġhair iḳhlās ke kyoñ bahr-e-sajda sar jhukātā hai

ai zāhid bandagī kā haq adā aise nahīñ hotā

mizājoñ meñ na jab tak narm goshe kār-farmā hoñ

diloñ kā fāsla dekho fanā aise nahīñ hotā

na jab tak ḳhuun ke chhīñTe lagā.e jaa.eñ gulshan meñ

kisī bhī shāḳh par pattā harā aise nahīñ hotā

mire siine meñ tere lams kī ThanDak na aa jaatī

maiñ tanhā.ī kī ātish meñ jalā aise nahīñ hotā

bahut dāman bachā kar jhāḌiyoñ meñ chalnā paḌtā hai

guloñ tak jaane kā tai rāsta aise nahīñ hotā

mirī mayyat pe aa kar muskurānā bhī zarūrī hai

mire qātil hisāb-e-ḳhūñ-bahā aise nahīñ hotā

sar-e-mahfil nazar un kī na ai 'muḳhtār' paḌ jaatī

to merī samt koī dekhtā aise nahīñ hotā

mohabbat ka diya jal kar bujha aise nahin hota

to jari zulmaton ka silsila aise nahin hota

hue ho jaise tum koi KHafa aise nahin hota

koi bhi zindagi bhar ko juda aise nahin hota

lahu ka rang bharna paDta hai lafzon ke KHakon mein

mukammal qissa-e-ahd-e-wafa aise nahin hota

baghair iKHlas ke kyon bahr-e-sajda sar jhukata hai

ai zahid bandagi ka haq ada aise nahin hota

mizajon mein na jab tak narm goshe kar-farma hon

dilon ka fasla dekho fana aise nahin hota

na jab tak KHun ke chhinTe lagae jaen gulshan mein

kisi bhi shaKH par patta hara aise nahin hota

mere sine mein tere lams ki ThanDak na aa jati

main tanhai ki aatish mein jala aise nahin hota

bahut daman bacha kar jhaDiyon mein chalna paDta hai

gulon tak jaane ka tai rasta aise nahin hota

meri mayyat pe aa kar muskurana bhi zaruri hai

mere qatil hisab-e-KHun-baha aise nahin hota

sar-e-mahfil nazar un ki na ai 'muKHtar' paD jati

to meri samt koi dekhta aise nahin hota