mohabbat ka jab roz-bazar hoga

mohabbat kā jab roz-bāzār hogā

bikeñge sar aur kam ḳharīdār hogā

tasallī huā sabr se kuchh maiñ tujh bin

kabhī ye qayāmat tarahdār hogā

sabā mū-e-zulf us kā TuuTe to Dar hai

ki ik vaqt meñ ye siyah-mār hogā

mirā daañt hai tere hoñToñ pe mat pūchh

kahūñgā to laḌne ko tayyār hogā

na ḳhālī rahegī mirī jāgah gar maiñ

na hūñgā to andoh bisyār hogā

ye mansūr kā ḳhūn-e-nāhaq ki haq thā

qayāmat ko kis kis se ḳhūñ-dār hogā

ajab shaiḳh-jī kī hai shakl-o-shamā.il

milegā to sūrat se bezār hogā

na ro ishq meñ dasht-gardī ko majnūñ

abhī kyā huā hai bahut ḳhvār hogā

khiñche ahd-e-ḳhat meñ bhī dil terī jānib

kabhū to qayāmat tarahdār hogā

zamīñ-gīr ho ijz se tū ki ik din

ye dīvār kā saaya dīvār hogā

na mar kar bhī chhūTegā itnā rukegā

tire daam meñ jo giraftār hogā

na pūchh apnī majlis meñ hai 'mīr' bhī yaañ

jo hogā to jaise gunahgār hogā

mohabbat ka jab roz-bazar hoga

bikenge sar aur kam KHaridar hoga

tasalli hua sabr se kuchh main tujh bin

kabhi ye qayamat tarahdar hoga

saba mu-e-zulf us ka TuTe to Dar hai

ki ek waqt mein ye siyah-mar hoga

mera dant hai tere honTon pe mat puchh

kahunga to laDne ko tayyar hoga

na KHali rahegi meri jagah gar main

na hunga to andoh bisyar hoga

ye mansur ka KHun-e-nahaq ki haq tha

qayamat ko kis kis se KHun-dar hoga

ajab shaiKH-ji ki hai shakl-o-shamail

milega to surat se bezar hoga

na ro ishq mein dasht-gardi ko majnun

abhi kya hua hai bahut KHwar hoga

khinche ahd-e-KHat mein bhi dil teri jaanib

kabhu to qayamat tarahdar hoga

zamin-gir ho ijz se tu ki ek din

ye diwar ka saya diwar hoga

na mar kar bhi chhuTega itna rukega

tere dam mein jo giraftar hoga

na puchh apni majlis mein hai 'mir' bhi yan

jo hoga to jaise gunahgar hoga