mohabbat ka jo ye anjam ho jae to hum jaanen

mohabbat kā jo ye anjām ho jaa.e to ham jāneñ

tirā jalva vafā paiġhām ho jaa.e to ham jāneñ

ḳhirad kā silsila āḳhir junūñ se mil ke rahtā hai

junūñ baḌh kar ḳhirad-anjām ho jaa.e to ham jāneñ

ye duniyā hai yahāñ par aadmī to laakh milte haiñ

jahāñ meñ ādamiyyat aam ho jaa.e to ham jāneñ

tirī dargāh meñ maqbūl haiñ jāh-o-hasham vaale

ġharīboñ kā bhī koī kaam ho jaa.e to ham jāneñ

ye ham bhī dekh leñ patthar meñ kaise joñk lagtī hai

kisī sūrat se vo but raam ho jaa.e to ham jāneñ

naqāb-e-ruḳh ulaT hī dī mirī gustāḳh nazroñ ne

mohabbat kī sahar ab shaam ho jaa.e to ham jāneñ

qadam kuchh zabt o jur.at se uThānā shart hai 'ālim'

mohabbat phir agar nākām ho jaa.e to ham jāneñ

mohabbat ka jo ye anjam ho jae to hum jaanen

tera jalwa wafa paigham ho jae to hum jaanen

KHirad ka silsila aaKHir junun se mil ke rahta hai

junun baDh kar KHirad-anjam ho jae to hum jaanen

ye duniya hai yahan par aadmi to lakh milte hain

jahan mein aadamiyyat aam ho jae to hum jaanen

teri dargah mein maqbul hain jah-o-hasham wale

gharibon ka bhi koi kaam ho jae to hum jaanen

ye hum bhi dekh len patthar mein kaise jonk lagti hai

kisi surat se wo but ram ho jae to hum jaanen

naqab-e-ruKH ulaT hi di meri gustaKH nazron ne

mohabbat ki sahar ab sham ho jae to hum jaanen

qadam kuchh zabt o jurat se uThana shart hai 'alim'

mohabbat phir agar nakaam ho jae to hum jaanen