mohabbat ka kisi ke dil mein ek arman paida kar

mohabbat kā kisī ke dil meñ ik armān paidā kar

ḳhudāyā us se milne kā koī sāmān paidā kar

jo inglistān kī sī bartarī ai hind chāhe tū

milā kar apne firqoñ ko ye izz-o-shān paidā kar

tire nāloñ se Dar kar chhoḌ de sayyād nā-mumkin

magar haañ dīda-e-tar se koī tūfān paidā kar

masā.ib se qafas ke tāqat-e-parvāz kab tujh ko

tū pahle apne uḌne kā koī sāmān paidā kar

butoñ kī yaad meñ saudā-e-sar se paak ho jā.ūñ

nasha aisā mire sar meñ mai-e-irfān paidā kar

vo bhole-pan se de de bosa-e-la.al-e-lab-e-shīrīñ

koī tarkīb aisī ai dil-e-nādān paidā kar

rumūz-e-āshiqī to sātvīñ manzil hai darmāñ kī

abhī to abjad-e-ma.anī se tū pahchān paidā kar

bulandī aur pastī kī hameñ kyā tū sunātā hai

kisī se tū bhī ai nāseh zarā īmān paidā kar

sune naala agar merā na hargiz jaur phir Dhaa.e

ilāhī ab to pīr-e-āsmāñ ke kaan paidā kar

abhī to pahlī manzil hai rah-e-maqsūd kī 'shaidā'

sañbhal kar chal zarā hushyār ho ausān paidā kar

mohabbat ka kisi ke dil mein ek arman paida kar

KHudaya us se milne ka koi saman paida kar

jo inglistan ki si bartari ai hind chahe tu

mila kar apne firqon ko ye izz-o-shan paida kar

tere nalon se Dar kar chhoD de sayyaad na-mumkin

magar han dida-e-tar se koi tufan paida kar

masaib se qafas ke taqat-e-parwaz kab tujh ko

tu pahle apne uDne ka koi saman paida kar

buton ki yaad mein sauda-e-sar se pak ho jaun

nasha aisa mere sar mein mai-e-irfan paida kar

wo bhole-pan se de de bosa-e-lal-e-lab-e-shirin

koi tarkib aisi ai dil-e-nadan paida kar

rumuz-e-ashiqi to satwin manzil hai darman ki

abhi to abjad-e-mani se tu pahchan paida kar

bulandi aur pasti ki hamein kya tu sunata hai

kisi se tu bhi ai naseh zara iman paida kar

sune nala agar mera na hargiz jaur phir Dhae

ilahi ab to pir-e-asman ke kan paida kar

abhi to pahli manzil hai rah-e-maqsud ki 'shaida'

sanbhal kar chal zara hushyar ho ausan paida kar