محبت کا میاں اپنا الگ دستور ہوتا ہے

محبت کا میاں اپنا الگ دستور ہوتا ہے

یہاں معشوق کا ہر فیصلہ منظور ہوتا ہے

پلاتا ہے تو کیوں پیر مغاں ہم کو صراحی سے

تو دیکھے گر نظر بھر کے تو دل مخمور ہوتا ہے

بھلے کاموں سے کل تک آدمی مشہور ہوتا تھا

برے کاموں سے انساں آج کل مشہور ہوتا ہے

یہی سب دیکھتے سنتے ضعیفی آ گئی مجھ پر

حکومت میں جو ہوتا ہے بہت مغرور ہوتا ہے

جسے دیکھو اٹھائے پھر رہا ہے لاش خود اپنی

یہاں ہر آدمی پیدائشی مزدور ہوتا ہے

سنو اے تاجؔ انساں چاہے جتنی کوششیں کر لے

وہی ہوتا ہے جو رب کو مرے منظور ہوتا ہے