mohabbat ka miyan apna alag dastur hota hai

mohabbat kā miyāñ apnā alag dastūr hotā hai

yahāñ mā'shūq kā har faisla manzūr hotā hai

pilātā hai tū kyoñ pīr-e-muġhāñ ham ko surāhī se

tū dekhe gar nazar-bhar ke to dil maḳhmūr hotā hai

bhale kāmoñ se kal tak aadmī mash.hūr hotā thā

bure kāmoñ se insāñ āj-kal mash.hūr hotā hai

yahī sab dekhte sunte za'īfī aa ga.ī mujh par

hukūmat meñ jo hotā hai bahut maġhrūr hotā hai

jise dekho uThā.e phir rahā hai laash ḳhud apnī

yahāñ har aadmī paidā.eshī mazdūr hotā hai

suno ai 'tāj' insāñ chāhe jitnī koshisheñ kar le

vahī hotā hai jo rab ko mire manzūr hotā hai

mohabbat ka miyan apna alag dastur hota hai

yahan ma'shuq ka har faisla manzur hota hai

pilata hai tu kyon pir-e-mughan hum ko surahi se

tu dekhe gar nazar-bhar ke to dil maKHmur hota hai

bhale kaamon se kal tak aadmi mashhur hota tha

bure kaamon se insan aaj-kal mashhur hota hai

yahi sab dekhte sunte za'ifi aa gai mujh par

hukumat mein jo hota hai bahut maghrur hota hai

jise dekho uThae phir raha hai lash KHud apni

yahan har aadmi paidaeshi mazdur hota hai

suno ai 'taj' insan chahe jitni koshishen kar le

wahi hota hai jo rab ko mere manzur hota hai