محبت کا یہ افسانہ حیات مختصر کا ہے

محبت کا یہ افسانہ حیات مختصر کا ہے

ہنسی تھوڑے دنوں کی ہے تو رونا عمر بھر کا ہے

ادب کا پاس ہے احساس بھی علم و ہنر کا ہے

یہ سب سرمایہ میرے پاس صحبت کے اثر کا ہے

بظاہر تو حقیقت ایک مشت خاک ہے لیکن

فرشتوں سے مقام اونچا بشر ابن بشر کا ہے

وہ کٹ جائے گا خم ہوگا نہ غیر اللہ کے آگے

مقام اتنا رفیع المرتبہ مومن کے سر کا ہے

خدا کا شکر میں اس رہنما کے کارواں میں ہوں

ہر اک ذرہ مہ و خورشید جس کی رہگزر کا ہے

ہوئے آزاد یوں تو ہو گئی آدھی صدی لیکن

وہی ہم ہیں قفس ہے اور ماتم بال و پر کا ہے

میں انورؔ ظرف انساں ایک پل میں ناپ لیتا ہوں

زہے قسمت مجھے حاصل وہ پیمانہ نظر کا ہے