mohabbat ka ye afsana hayat-e-muKHtasar ka hai

mohabbat kā ye afsāna hayāt-e-muḳhtasar kā hai

hañsī thoḌe dinoñ kī hai to ronā umr bhar kā hai

adab kā paas hai ehsās bhī ilm-o-hunar kā hai

ye sab sarmāya mere paas sohbat ke asar kā hai

ba-zāhir to haqīqat ek musht-e-ḳhāk hai lekin

farishtoñ se maqām ūñchā bashar ibn-e-bashar kā hai

vo kaT jā.egā ḳham hogā na ġhairullāh ke aage

maqām itnā rafī-ul-martaba momin ke sar kā hai

ḳhudā kā shukr maiñ us rahnumā ke kārvāñ meñ huuñ

har-ik zarra mah-o-ḳhurshīd jis kī rah-guzar kā hai

hue āzād yuuñ to ho ga.ī aadhī sadī lekin

vahī ham haiñ qafas hai aur mātam bāl-o-par kā hai

maiñ 'anvar' zarf-e-insāñ ek pal meñ naap letā huuñ

zahe-qismat mujhe hāsil vo paimāna nazar kā hai

mohabbat ka ye afsana hayat-e-muKHtasar ka hai

hansi thoDe dinon ki hai to rona umr bhar ka hai

adab ka pas hai ehsas bhi ilm-o-hunar ka hai

ye sab sarmaya mere pas sohbat ke asar ka hai

ba-zahir to haqiqat ek musht-e-KHak hai lekin

farishton se maqam uncha bashar ibn-e-bashar ka hai

wo kaT jaega KHam hoga na ghairullah ke aage

maqam itna rafi-ul-martaba momin ke sar ka hai

KHuda ka shukr main us rahnuma ke karwan mein hun

har-ik zarra mah-o-KHurshid jis ki rah-guzar ka hai

hue aazad yun to ho gai aadhi sadi lekin

wahi hum hain qafas hai aur matam baal-o-par ka hai

main 'anwar' zarf-e-insan ek pal mein nap leta hun

zahe-qismat mujhe hasil wo paimana nazar ka hai