mohabbat ka ye jazba marne ka na hai

mohabbat kā ye jazba marne kā nā hai

vo ab mere dil se utarne kā nā hai

kahāñ us farebī kī bātoñ meñ aa.e

vo jo kah rahā hai vo karne kā nā hai

abhī to shurūāt hai āshiqī kī

abhī bhuut sar se utarne kā nā hai

judā.ī ke sadme haiñ bas chaar din ke

kisī ke liye koī marne kā nā hai

to kar luuñ yaqīñ us ke ahd-e-vafā par

vo ye kah rahā hai mukarne kā nā hai

ye āñkheñ nahīñ us kī bahr-e-jafā haiñ

jo Dūbegā in meñ ubharne kā nā hai

agar bhuul saktā bhulā detā ab tak

tirī yaad kā zaḳhm bharne kā nā hai

tū jab itnī ūñchī uḌāneñ bharegā

to hāsid tire par katarne kā nā hai

tihattar girohoñ meñ jab baT ga.e ham

to shīrāza apnā bikharne kā nā hai

balā kā vo hushiyār samjhe hai ḳhud ko

magar mere aage Thaharne kā nā hai

vo hai bevafā to koī us se kah de

'farāz' us ke sadme meñ marne kā nā hai

mohabbat ka ye jazba marne ka na hai

wo ab mere dil se utarne ka na hai

kahan us farebi ki baaton mein aae

wo jo kah raha hai wo karne ka na hai

abhi to shuruat hai aashiqi ki

abhi bhut sar se utarne ka na hai

judai ke sadme hain bas chaar din ke

kisi ke liye koi marne ka na hai

to kar lun yaqin us ke ahd-e-wafa par

wo ye kah raha hai mukarne ka na hai

ye aankhen nahin us ki bahr-e-jafa hain

jo Dubega in mein ubharne ka na hai

agar bhul sakta bhula deta ab tak

teri yaad ka zaKHm bharne ka na hai

tu jab itni unchi uDanen bharega

to hasid tere par katarne ka na hai

tihattar girohon mein jab baT gae hum

to shiraaza apna bikharne ka na hai

bala ka wo hushiyar samjhe hai KHud ko

magar mere aage Thaharne ka na hai

wo hai bewafa to koi us se kah de

'faraaz' us ke sadme mein marne ka na hai