mohabbat karne wale gham ka afsana nahin kahte

mohabbat karne vaale ġham kā afsāna nahīñ kahte

ki dīvāne kabhī apne ko dīvāna nahīñ kahte

bharam meñ Daal rakkhā hai mujhe is kaj-adā.ī ne

kabhī bhī rū-ba-rū mujh ko vo begāna nahīñ kahte

yahāñ tak tum ne tanhā kar diyā ham ko zamāne se

ki apne ghar ko bhī ham apnā kāshāna nahīñ kahte

ḳhas-o-ḳhāshāk bhar lete haiñ ham armāñ ke dāman meñ

kabhī is dil ke māmūre ko vīrāna nahīñ kahte

bhalā sā tanz hai un kā hamārī jubba-sā.ī par

ise sar phoḌnā kahte haiñ nazrāna nahīñ kahte

ġham-e-dil merī āñkhoñ se Tapak jaate haiñ dhīre se

chhalak jaane kī koī baat paimāna nahīñ kahte

tumhāre naam par mausūm kar dete haiñ sab 'rāzī'

kabhī ham laġhzish-e-sāġhar ko mastāna nahīñ kahte

mohabbat karne wale gham ka afsana nahin kahte

ki diwane kabhi apne ko diwana nahin kahte

bharam mein Dal rakkha hai mujhe is kaj-adai ne

kabhi bhi ru-ba-ru mujh ko wo begana nahin kahte

yahan tak tum ne tanha kar diya hum ko zamane se

ki apne ghar ko bhi hum apna kashana nahin kahte

KHas-o-KHashak bhar lete hain hum arman ke daman mein

kabhi is dil ke mamure ko virana nahin kahte

bhala sa tanz hai un ka hamari jubba-sai par

ise sar phoDna kahte hain nazrana nahin kahte

gham-e-dil meri aankhon se Tapak jate hain dhire se

chhalak jaane ki koi baat paimana nahin kahte

tumhaare nam par mausum kar dete hain sab 'raazi'

kabhi hum laghzish-e-saghar ko mastana nahin kahte