mohabbat karne wale kab kisi ka nam lete hain

mohabbat karne vaale kab kisī kā naam lete haiñ

zabāñ ḳhāmosh rahtī hai nazar se kaam lete haiñ

vo kaise log haiñ yārab girāte haiñ jo insāñ ko

yaqīnan vo farishte haiñ jo baḌh kar thaam lete haiñ

ta.ajjub-ḳhez hai dastūr yārab terī duniyā kā

miTāte haiñ jo duniyā ko vahī in.aam lete haiñ

yahī apnī ibādat hai yahī hai bandagī apnī

tumhārā zikr karte haiñ tumhārā naam lete haiñ

jafā.eñ haiñ adāvat hai sitam hai bevafā.ī hai

ḳhushī se apne sar ham baḌh ke har ilzām lete haiñ

kahāñ kā nashsha mai kaisī na maiḳhāne na mai-noshī

tirī āñkhoñ ke paimānoñ se bhar kar jaam lete haiñ

tabāhī kā gila tum se nahīñ to phir karūñ kis se

mirī ulfat ke afsāne tumhārā naam lete haiñ

mohabbat karne wale kab kisi ka nam lete hain

zaban KHamosh rahti hai nazar se kaam lete hain

wo kaise log hain yarab giraate hain jo insan ko

yaqinan wo farishte hain jo baDh kar tham lete hain

tajjub-KHez hai dastur yarab teri duniya ka

miTate hain jo duniya ko wahi inam lete hain

yahi apni ibaadat hai yahi hai bandagi apni

tumhaara zikr karte hain tumhaara nam lete hain

jafaen hain adawat hai sitam hai bewafai hai

KHushi se apne sar hum baDh ke har ilzam lete hain

kahan ka nashsha mai kaisi na maiKHane na mai-noshi

teri aankhon ke paimanon se bhar kar jam lete hain

tabahi ka gila tum se nahin to phir karun kis se

meri ulfat ke afsane tumhaara nam lete hain