mohabbat Khaar-e-daman ban ke ruswa ho gai aaKHir

mohabbat ḳhār-e-dāman ban ke rusvā ho ga.ī āḳhir

ye aqlīm-e-azīzāñ be-zuleḳhā ho ga.ī āḳhir

bisāt-e-ārzū tasvīr-e-sahrā ho ga.ī āḳhir

vo hañgāmoñ kī bastī ho kī duniyā ho ga.ī āḳhir

nishān-e-sub.h yuuñ gum hai ki ab nikle na jab nikle

udhar andāz-e-shab aisā ki goyā ho ga.ī āḳhir

mirī āñkhoñ kā bas ik ḳhvāb thī vo hasrat-e-pinhāñ

jo ḳhud un kī nigāhoñ kā taqāzā ho ga.ī āḳhir

qalam ko hai usī sūrat-kade kī justujū ya.anī

kahīñ pinhāñ thī vo sūrat jo paidā ho ga.ī āḳhir

faqat īmāñ hī kyā pāmāl haiñ īmāñ-shikan lākhoñ

diloñ kī vo matā-e-kāfirī kyā ho ga.ī āḳhir

numūd-e-sub.h-e-va.ada se to ḳhair ummīd hī kyā thī

vo furqat kī shab-e-hañgāma-ārā ho ga.ī āḳhir

kabhī ye larzisheñ sāz-āshnā hoñgī to dekhoge

diloñ kī be-kalī āshob-e-dariyā ho ga.ī āḳhir

ham apne chāk-e-dāman par bahut rusvā rahe 'haqqī'

nazar ā.īn-e-mahfil se shanāsā ho ga.ī āḳhir

mohabbat KHar-e-daman ban ke ruswa ho gai aaKHir

ye aqlim-e-azizan be-zuleKHa ho gai aaKHir

bisat-e-arzu taswir-e-sahra ho gai aaKHir

wo hangamon ki basti ho ki duniya ho gai aaKHir

nishan-e-subh yun gum hai ki ab nikle na jab nikle

udhar andaz-e-shab aisa ki goya ho gai aaKHir

meri aankhon ka bas ek KHwab thi wo hasrat-e-pinhan

jo KHud un ki nigahon ka taqaza ho gai aaKHir

qalam ko hai usi surat-kade ki justuju yani

kahin pinhan thi wo surat jo paida ho gai aaKHir

faqat iman hi kya pamal hain iman-shikan lakhon

dilon ki wo mata-e-kafiri kya ho gai aaKHir

numud-e-subh-e-wada se to KHair ummid hi kya thi

wo furqat ki shab-e-hangama-ara ho gai aaKHir

kabhi ye larzishen saz-ashna hongi to dekhoge

dilon ki be-kali aashob-e-dariya ho gai aaKHir

hum apne chaak-e-daman par bahut ruswa rahe 'haqqi'

nazar aain-e-mahfil se shanasa ho gai aaKHir