mohabbat ki bulandi se kabhi utra nahin jata

mohabbat kī bulandī se kabhī utrā nahīñ jaatā

tirā dar chhoḌ ke mujh se kahīñ jaayā nahīñ jaatā

maiñ apnī dāstān-e-ġham sunā detā tujhe lekin

tirā utrā huā chehra mujhe dekhā nahīñ jaatā

buzurgoñ kī duā.eñ bhī safar meñ saath hotī haiñ

bigāḌegā koī kyā maiñ kahīñ tanhā nahīñ jaatā

ġharīboñ ko hiqārat kī nazar se dekhte haiñ jo

kabhī aise amīroñ ke yahāñ jaayā nahīñ jaatā

ġhamoñ kī dhuup meñ kuchh is tarah badlā mirā chehra

ki mere dostoñ se bhī ye pahchānā nahīñ jaatā

thakā huuñ rāh-e-manzil kā mujhe sonā zarūrī hai

magar kuchh baat hī aisī hai jo soyā nahīñ jaatā

yahī saudā-garān-fan se kahnā hai 'zafar' mujh ko

ġhazal ko chand sikkoñ ke evaz bechā nahīñ jaatā

mohabbat ki bulandi se kabhi utra nahin jata

tera dar chhoD ke mujh se kahin jaya nahin jata

main apni dastan-e-gham suna deta tujhe lekin

tera utra hua chehra mujhe dekha nahin jata

buzurgon ki duaen bhi safar mein sath hoti hain

bigaDega koi kya main kahin tanha nahin jata

gharibon ko hiqarat ki nazar se dekhte hain jo

kabhi aise amiron ke yahan jaya nahin jata

ghamon ki dhup mein kuchh is tarah badla mera chehra

ki mere doston se bhi ye pahchana nahin jata

thaka hun rah-e-manzil ka mujhe sona zaruri hai

magar kuchh baat hi aisi hai jo soya nahin jata

yahi sauda-garan-fan se kahna hai 'zafar' mujh ko

ghazal ko chand sikkon ke ewaz becha nahin jata