mohabbat ki duniya mein aa kar to dekho

mohabbat kī duniyā meñ aa kar to dekho

kisī ko tum apnā banā kar to dekho

mire ishq ko aazmā kar to dekho

mirī jaan par hashr Dhā kar to dekho

koī shai nigāhoñ se bāhar nahīñ hai

nigāhoñ se pardā haTā kar to dekho

mohabbat kī duniyā hai rāhat kī duniyā

mohabbat kī duniyā basā kar to dekho

samajh jāoge dard dil chiiz kyā hai

kabhī ishq kī choT khā kar to dekho

nahīñ dil-lagī dil kisī se lagānā

kisī se zarā dil lagā kar to dekho

yahī rāh-e-hastī ko raushan karegā

charāġh-e-mohabbat jalā kar to dekho

hameñ tāb-e-dīdār hai yā nahīñ hai

muqābil nigāhoñ ke aa kar to dekho

hamārī nazar meñ baḌī vus.ateñ haiñ

hamārī nazar meñ samā kar to dekho

batā deñge ham ishq hai naam kis kā

hameñ apnā 'shaidā' banā kar to dekho

mohabbat ki duniya mein aa kar to dekho

kisi ko tum apna bana kar to dekho

mere ishq ko aazma kar to dekho

meri jaan par hashr Dha kar to dekho

koi shai nigahon se bahar nahin hai

nigahon se parda haTa kar to dekho

mohabbat ki duniya hai rahat ki duniya

mohabbat ki duniya basa kar to dekho

samajh jaoge dard dil chiz kya hai

kabhi ishq ki choT kha kar to dekho

nahin dil-lagi dil kisi se lagana

kisi se zara dil laga kar to dekho

yahi rah-e-hasti ko raushan karega

charagh-e-mohabbat jala kar to dekho

hamein tab-e-didar hai ya nahin hai

muqabil nigahon ke aa kar to dekho

hamari nazar mein baDi wusaten hain

hamari nazar mein sama kar to dekho

bata denge hum ishq hai nam kis ka

hamein apna 'shaida' bana kar to dekho