mohabbat kis se kab ho jae andaza nahin hota

mohabbat kis se kab ho jaa.e andāza nahīñ hotā

ye vo ghar hai ki jis kā koī darvāza nahīñ hotā

diloñ ko dard kī tahzīb se ābād rakhtī hai

mohabbat meñ kisī ko koī ḳhamyāza nahīñ hotā

kahīñ koī na koī ik kamī baaqī hī rahtī hai

mukammal zindagī kā koī shīrāza nahīñ hotā

ajab begāngī-o-nā-shanāsā.ī kā aalam hai

tirī galiyoñ meñ bhī ab mujh pe āvāza nahīñ hotā

hamesha hī yahāñ ik ābshār-e-dard bahtā hai

ki dil kī mumlikat meñ koī ġham taaza nahīñ hotā

kisī mahbūb lamhe meñ kisī vīrān raste par

koī kab yaad aa jaa.e ye andāza nahīñ hotā

bahut kuchh dil meñ hotā hai magar 'ashfāq' chehre par

kisī kī yaad kā bikhrā huā ġhāza nahīñ hotā

mohabbat kis se kab ho jae andaza nahin hota

ye wo ghar hai ki jis ka koi darwaza nahin hota

dilon ko dard ki tahzib se aabaad rakhti hai

mohabbat mein kisi ko koi KHamyaza nahin hota

kahin koi na koi ek kami baqi hi rahti hai

mukammal zindagi ka koi shiraaza nahin hota

ajab begangi-o-na-shanasai ka aalam hai

teri galiyon mein bhi ab mujh pe aawaza nahin hota

hamesha hi yahan ek aabshaar-e-dard bahta hai

ki dil ki mumlikat mein koi gham taza nahin hota

kisi mahbub lamhe mein kisi viran raste par

koi kab yaad aa jae ye andaza nahin hota

bahut kuchh dil mein hota hai magar 'ashfaq' chehre par

kisi ki yaad ka bikhra hua ghaza nahin hota