mohabbat ko pazirai mili hai

mohabbat ko pazīrā.ī milī hai

tumhāre dar se rusvā.ī milī hai

bahār-e-lāla-o-gul ko chaman meñ

tire aariz se ra.anā.ī milī hai

huā vo ḳhud se begāna jahāñ meñ

jise terī shanāsā.ī milī hai

junūñ ke faiz se pā-e-talab ko

matā.a-e-ābla-pā.ī milī hai

tirī mahfil meñ zabt-e-dil ke sadqe

ḳhamoshī ko bhī goyā.ī milī hai

tirī āñkhoñ meñ ham Duube to dil ko

samundar kī sī gahrā.ī milī hai

hue ābād ham barbād ho kar

basārat kho ke bīnā.ī milī hai

hameñ zinda kiyā murda-dilī ne

tujhe shān-e-masīhā.ī milī hai

vahī hai mahram-e-asrār jis ko

junūñ ke dar se dānā.ī milī hai

'tufail' us shahr-yār-e-shahr-e-gul se

nigār-e-gul ko zebā.ī milī hai

mohabbat ko pazirai mili hai

tumhaare dar se ruswai mili hai

bahaar-e-lala-o-gul ko chaman mein

tere aariz se ranai mili hai

hua wo KHud se begana jahan mein

jise teri shanasai mili hai

junun ke faiz se pa-e-talab ko

mataa-e-abla-pai mili hai

teri mahfil mein zabt-e-dil ke sadqe

KHamoshi ko bhi goyai mili hai

teri aankhon mein hum Dube to dil ko

samundar ki si gahrai mili hai

hue aabaad hum barbaad ho kar

basarat kho ke binai mili hai

hamein zinda kiya murda-dili ne

tujhe shan-e-masihai mili hai

wahi hai mahram-e-asrar jis ko

junun ke dar se danai mili hai

'tufail' us shahr-yar-e-shahr-e-gul se

nigar-e-gul ko zebai mili hai