mohabbat ko riya ki qaid se aazad karna hai

mohabbat ko riyā kī qaid se āzād karnā hai

hameñ phir ārzūoñ kā nagar ābād karnā hai

shikast-e-fāsh denī hai man-o-tū ke ravayyoñ ko

marāsim kī bahālī kā hunar ījād karnā hai

ye kyā jabr-e-ta.alluq hai ki phir tere havāle se

kisī ko bhuul jaanā hai kisī ko yaad rakhnā hai

guzishta 'ahd meñ bhī jurm thā ye kār-e-haq-goī

hamārī nasl ko bhī ye ba-sad uftād karnā hai

ka.ī dīgar havāle bhī surūr-o-rāhat-e-dil haiñ

ga.e mausam kī nisbat se tumheñ bhī yaad karnā hai

hamāre she'r agar jazboñ ko ḳhushbū de nahīñ sakte

to phir to she'r kahnā vaqt ko barbād karnā hai

mohabbat ko riya ki qaid se aazad karna hai

hamein phir aarzuon ka nagar aabaad karna hai

shikast-e-fash deni hai man-o-tu ke rawayyon ko

marasim ki bahaali ka hunar ijad karna hai

ye kya jabr-e-talluq hai ki phir tere hawale se

kisi ko bhul jaana hai kisi ko yaad rakhna hai

guzishta 'ahd mein bhi jurm tha ye kar-e-haq-goi

hamari nasl ko bhi ye ba-sad uftad karna hai

kai digar hawale bhi surur-o-rahat-e-dil hain

gae mausam ki nisbat se tumhein bhi yaad karna hai

hamare she'r agar jazbon ko KHushbu de nahin sakte

to phir to she'r kahna waqt ko barbaad karna hai