mohabbat mawara-e-kufr-o-din hai

mohabbat māvarā-e-kufr-o-dīñ hai

mohabbat kā koī maz.hab nahīñ hai

mohabbat husn hai husn-āfrīñ hai

mohabbat husn se baḌh kar hasīñ hai

badal is kā zamāne meñ nahīñ hai

baḌī daulat mirā husn-e-yaqīñ hai

tasavvur meñ vo zulf-e-ambarīñ hai

nazar meñ ab na duniyā hai na diiñ hai

mujhe is qaul par apne yaqīñ hai

na ho jis se ḳhayānat vo amiiñ hai

ba-zāhir ḳhaak kā putlā hai sab kuchh

jo dekho ġhaur se kuchh bhī nahīñ hai

mohabbat jis ko kahtā hai zamāna

yahī vo zahr hai jo ābgīñ hai

sañbhalnā ai dil-e-nādāñ sañbhalnā

baḌī qātil nigāh-e-avvalīñ hai

mukāfāt-e-amal hai bazm-e-hastī

yahīñ dozaḳh yahīñ ḳhuld-e-barīñ hai

haqīqat husn kī kuchh hai to itnī

jo chaḌh jaa.e nazar meñ vo hasīñ hai

mohabbat kā nahīñ hai koī ḳhāliq

mohabbat ḳhud mohabbat-āfrīñ hai

bharosa kyā kare koī kisī par

jo apnā hai vahī apnā nahīñ hai

kahā jaatā hai ye 'tālib' se aksar

suḳhan terā nihāyat dil-nashīñ hai

mohabbat mawara-e-kufr-o-din hai

mohabbat ka koi mazhab nahin hai

mohabbat husn hai husn-afrin hai

mohabbat husn se baDh kar hasin hai

badal is ka zamane mein nahin hai

baDi daulat mera husn-e-yaqin hai

tasawwur mein wo zulf-e-ambarin hai

nazar mein ab na duniya hai na din hai

mujhe is qaul par apne yaqin hai

na ho jis se KHayanat wo amin hai

ba-zahir KHak ka putla hai sab kuchh

jo dekho ghaur se kuchh bhi nahin hai

mohabbat jis ko kahta hai zamana

yahi wo zahr hai jo aabgin hai

sanbhalna ai dil-e-nadan sanbhalna

baDi qatil nigah-e-awwalin hai

mukafat-e-amal hai bazm-e-hasti

yahin dozaKH yahin KHuld-e-barin hai

haqiqat husn ki kuchh hai to itni

jo chaDh jae nazar mein wo hasin hai

mohabbat ka nahin hai koi KHaliq

mohabbat KHud mohabbat-afrin hai

bharosa kya kare koi kisi par

jo apna hai wahi apna nahin hai

kaha jata hai ye 'talib' se aksar

suKHan tera nihayat dil-nashin hai