mohabbat mein aaram sab chahte hain

mohabbat meñ ārām sab chāhte haiñ

magar hazrat-e-'dāġh' kab chāhte haiñ

ḳhatā kyā hai un kī jo us but ko chāhā

ḳhudā chāhtā hai to sab chāhte haiñ

vahī un kā matlūb o mahbūb Thahrā

bajā hai jo us kī talab chāhte haiñ

magar ālam-e-yās meñ tañg aa kar

ye sāmān-e-āfat ajab chāhte haiñ

ajal kī duā har ghaḌī māñgte haiñ

ġham-o-dard-o-rañj-o-ta.ab chāhte haiñ

na tafrīh-e-āsā.ish-e-dil kī ḳhvāhish

na sāmān-e-aish-o-tarab chāhte haiñ

qayāmat bapā ho nuzūl-e-balā ho

yahī āj-kal roz o shab chāhte haiñ

na māshūq-e-farḳhār se un ko matlab

na ye jām-e-bintul-inab chāhte haiñ

na jannat kī hasrat na hūroñ kī parvā

na koī ḳhushī kā sabab chāhte haiñ

nirālī tamannā hai ahl-e-karam se

sitam chāhte haiñ ġhazab chāhte haiñ

na ho koī āgāh rāz-e-nihāñ se

ḳhamoshī ko ye mohr-e-lab chāhte haiñ

ḳhudā un kī chāhat se mahfūz rakkhe

ye āzār bhī muntaḳhab chāhte haiñ

ġham-e-ishq meñ 'dāġh' majbūr ho kar

kabhī jo na chāhā vo ab chāhte haiñ

mohabbat mein aaram sab chahte hain

magar hazrat-e-'dagh' kab chahte hain

KHata kya hai un ki jo us but ko chaha

KHuda chahta hai to sab chahte hain

wahi un ka matlub o mahbub Thahra

baja hai jo us ki talab chahte hain

magar aalam-e-yas mein tang aa kar

ye saman-e-afat ajab chahte hain

ajal ki dua har ghaDi mangte hain

gham-o-dard-o-ranj-o-tab chahte hain

na tafrih-e-asaish-e-dil ki KHwahish

na saman-e-aish-o-tarab chahte hain

qayamat bapa ho nuzul-e-bala ho

yahi aaj-kal roz o shab chahte hain

na mashuq-e-farKHar se un ko matlab

na ye jam-e-bintul-inab chahte hain

na jannat ki hasrat na huron ki parwa

na koi KHushi ka sabab chahte hain

nirali tamanna hai ahl-e-karam se

sitam chahte hain ghazab chahte hain

na ho koi aagah raaz-e-nihan se

KHamoshi ko ye mohr-e-lab chahte hain

KHuda un ki chahat se mahfuz rakkhe

ye aazar bhi muntaKHab chahte hain

gham-e-ishq mein 'dagh' majbur ho kar

kabhi jo na chaha wo ab chahte hain