mohabbat mein koi aashiq agar fankar ban jae

mohabbat meñ koī āshiq agar fankār ban jaa.e

to phir ye ain mumkin hai ki dil bāzār ban jaa.e

tirī rāheñ tirā kūcha agar ghar-bār ban jaa.e

tirī hasrat meñ jo mar jaa.e vo me.amār ban jaa.e

vo sāhir jo banā detā hai patthar sab divānoñ ko

hai mumkin us kī lāThī bhī kabhī talvār ban jaa.e

zarā sī der bas aa jā mire dīdār kī ḳhātir

kahīñ aisā na ho ye jism bhī murdār ban jaa.e

mujhe kuchh bhī nahīñ kahnā faqat ḳhāmosh rahnā hai

na jaane kab mire hāthoñ koī shahkār ban jaa.e

fanā ho jā.eñge ik roz duniyā ke sabhī zālim

hamārā ik mujāhid sā agar kirdār ban jaa.e

ḳhudārā 'faiz' ko itnī nahīñ daulat atā karnā

kahīñ aisā na ho bhaa.ī mirā ġhaddār ban jaa.e

mohabbat mein koi aashiq agar fankar ban jae

to phir ye ain mumkin hai ki dil bazar ban jae

teri rahen tera kucha agar ghar-bar ban jae

teri hasrat mein jo mar jae wo meamar ban jae

wo sahir jo bana deta hai patthar sab diwanon ko

hai mumkin us ki laThi bhi kabhi talwar ban jae

zara si der bas aa ja mere didar ki KHatir

kahin aisa na ho ye jism bhi murdar ban jae

mujhe kuchh bhi nahin kahna faqat KHamosh rahna hai

na jaane kab mere hathon koi shahkar ban jae

fana ho jaenge ek roz duniya ke sabhi zalim

hamara ek mujahid sa agar kirdar ban jae

KHudara 'faiz' ko itni nahin daulat ata karna

kahin aisa na ho bhai mera ghaddar ban jae