mohabbat mein luTa kar din-o-dil ye aabru pai

mohabbat meñ luTā kar dīn-o-dil ye aabrū paa.ī

koī kahtā hai dīvāna koī kahtā hai saudā.ī

ye farzānoñ kī duniyā ek dīvānoñ kī duniyā hai

jo puḳhta-kār-e-ulfat haiñ unheñ kahte haiñ saudā.ī

'ayāñ har barg-o-gul se hai vahī jān-e-bahār apnā

ye rang-o-bū kī duniyā hai usī kī bazm-ārā.ī

agar un kī ġhalat-andāz nazreñ mujh pe paḌ jaa.eñ

to merā baḳht-e-ḳhufta jaag uTThe le ke añgḌā.ī

huā ḳhalvat-sarā-e-dil meñ ik hangāma kyoñ barpā

hameñ baiThe-biThā.e aaj phir ye kis kī yaad aa.ī

murādeñ jin kī bar aatī haiñ aise bhī haiñ duniyā meñ

yahāñ to ārzū-e-marg bhī apnī na bar aa.ī

na jaane kyā kaheñ ai 'ḳhār' āh-e-sard ko merī

mire naale ko jo be-vaqt kī kahte haiñ shahnā.ī

mohabbat mein luTa kar din-o-dil ye aabru pai

koi kahta hai diwana koi kahta hai saudai

ye farzanon ki duniya ek diwanon ki duniya hai

jo puKHta-kar-e-ulfat hain unhen kahte hain saudai

'ayan har barg-o-gul se hai wahi jaan-e-bahaar apna

ye rang-o-bu ki duniya hai usi ki bazm-arai

agar un ki ghalat-andaz nazren mujh pe paD jaen

to mera baKHt-e-KHufta jag uTThe le ke angDai

hua KHalwat-sara-e-dil mein ek hangama kyon barpa

hamein baiThe-biThae aaj phir ye kis ki yaad aai

muraden jin ki bar aati hain aise bhi hain duniya mein

yahan to aarzu-e-marg bhi apni na bar aai

na jaane kya kahen ai 'KHar' aah-e-sard ko meri

mere nale ko jo be-waqt ki kahte hain shahnai