mohabbat mein nigah-e-sharmagin jine nahin deti

mohabbat meñ nigāh-e-sharmagīñ jiine nahīñ detī

falak badnām hai lekin zamīñ jiine nahīñ detī

hayāt-o-maut kī ye kashmakash bhī ik tamāshā hai

ki haañ marne nahīñ detī nahīñ jiine nahīñ detī

vo kahte haiñ mire naqsh-e-qadam kī kyā ḳhatā us meñ

jo tujh ko terī āvāra jabīñ jiine nahīñ detī

rahūñ gulshan meñ yā sahrā meñ dīvāna hī kahtī hai

ye duniyā kaisī duniyā hai kahīñ jiine nahīñ detī

junūñ kahtā hai koī taar bhī baaqī na rah jaa.e

ḳhirad ko fikr-e-jeb-o-āstīñ jiine nahīñ detī

mubārak nāla-e-mazlūm vo zālim pukār uTThā

are ab terī āh-e-ātishīñ jiine nahīñ detī

amal kī quvvateñ haiñ tābe-e-hosh-o-ḳhirad 'nāzish'

mujhe merī nigāh-e-dūr-bīñ meñ jiine nahīñ detī

mohabbat mein nigah-e-sharmagin jine nahin deti

falak badnam hai lekin zamin jine nahin deti

hayat-o-maut ki ye kashmakash bhi ek tamasha hai

ki han marne nahin deti nahin jine nahin deti

wo kahte hain mere naqsh-e-qadam ki kya KHata us mein

jo tujh ko teri aawara jabin jine nahin deti

rahun gulshan mein ya sahra mein diwana hi kahti hai

ye duniya kaisi duniya hai kahin jine nahin deti

junun kahta hai koi tar bhi baqi na rah jae

KHirad ko fikr-e-jeb-o-astin jine nahin deti

mubarak nala-e-mazlum wo zalim pukar uTTha

are ab teri aah-e-atishin jine nahin deti

amal ki quwwaten hain tabe-e-hosh-o-KHirad 'nazish'

mujhe meri nigah-e-dur-bin mein jine nahin deti