محبت میں سدا قائم جہاں معیار رہتے ہیں

محبت میں سدا قائم جہاں معیار رہتے ہیں

کہانی ختم ہو جائے مگر کردار رہتے ہیں

تمہارا ساتھ ملنے سے مجھے بھی مل گئی شہرت

یہ پھولوں کی نوازش ہے معطر خار رہتے ہیں

مسافر جاگتے رہنا یہ بستی ہے لٹیروں کی

یہاں رہبر کی وردی میں چھپے اغیار رہتے ہیں

غلط فہمی کراتی ہے دلوں میں دوریاں پیدا

جنہیں کل تک محبت تھی وہی بیزار رہتے ہیں

لگائے دل پہ جو مرہم وہ ڈھونڈے سے نہیں ملتا

نمک زخموں پہ ملنے کو یہاں دو چار رہتے ہیں

نہ قیمت کم زیادہ ہے نہ ٹوٹے ہیں کہیں سے ہم

مگر پھر بھی نہیں بکتے سر بازار رہتے ہیں

یہ کیسا دور آیا زینؔ دنیا میں صحافت کی

تعصب کی سیاہی سے بھرے اخبار رہتے ہیں