mohabbat mein sada qaem jahan meayar rahte hain

mohabbat meñ sadā qaa.em jahāñ me.ayār rahte haiñ

kahānī ḳhatm ho jaa.e magar kirdār rahte haiñ

tumhārā saath milne se mujhe bhī mil ga.ī shohrat

ye phūloñ kī navāzish hai mo.attar ḳhaar rahte haiñ

musāfir jāgte rahnā ye bastī hai luTeroñ kī

yahāñ rahbar kī vardī meñ chhupe aġhyār rahte haiñ

ġhalat-fahmī karātī hai diloñ meñ dūriyāñ paidā

jinheñ kal tak mohabbat thī vahī be-zār rahte haiñ

lagā.e dil pa jo marham vo DhūñDe se nahīñ miltā

namak zaḳhmoñ pe milne ko yahāñ do chaar rahte haiñ

na qīmat kam ziyāda hai na TuuTe haiñ kahīñ se ham

magar phir bhī nahīñ bikte sar-e-bāzār rahte haiñ

ye kaisā daur aaya 'zain' duniyā meñ sahāfat kī

ta.assub kī siyāhī se bhare aḳhbār rahte haiñ

mohabbat mein sada qaem jahan meayar rahte hain

kahani KHatm ho jae magar kirdar rahte hain

tumhaara sath milne se mujhe bhi mil gai shohrat

ye phulon ki nawazish hai moattar KHar rahte hain

musafir jagte rahna ye basti hai luTeron ki

yahan rahbar ki wardi mein chhupe aghyar rahte hain

ghalat-fahmi karaati hai dilon mein duriyan paida

jinhen kal tak mohabbat thi wahi be-zar rahte hain

lagae dil pa jo marham wo DhunDe se nahin milta

namak zaKHmon pe milne ko yahan do chaar rahte hain

na qimat kam ziyaada hai na TuTe hain kahin se hum

magar phir bhi nahin bikte sar-e-bazar rahte hain

ye kaisa daur aaya 'zain' duniya mein sahafat ki

tassub ki siyahi se bhare aKHbar rahte hain