محبت مجھ سے کہتی تھی ذرا ہشیار دامن سے

محبت مجھ سے کہتی تھی ذرا ہشیار دامن سے

جنوں آواز دیتا تھا وہ الجھے خار دامن سے

مرے اشک مسلسل رائیگاں ہونے نہیں دیتا

بہت نزدیک رہتا ہے خیال یار دامن سے

سنبھل و رہرو راہ طلب منزل نہ کھو جائے

لپٹتا ہے غبار راہ نا ہموار دامن سے

جبیں سائی کہاں کی کس کا سجدہ کچھ جو قابو ہو

چھپا کر بیٹھ جاؤں آستان یار دامن سے

ہوا دیتے رہے دانستہ دیوانہ سمجھ کر وہ

جنوں ہوتا رہا اکثر مرا بیدار دامن سے

ابھرتی جاتی ہے دامن پہ اشک خوں کی رنگینی

نمایاں ہوتا جاتا ہے نیا گلزار دامن سے

اسے طوفاں کہوں یا جان ساحل کیا کہوں شاہدؔ

نہ ابھرے جذب ہو کر اشک دریا بار دامن سے