mohabbat phul bhi hai Khaar bhi hai

mohabbat phuul bhī hai ḳhaar bhī hai

ye vīrāna bhī hai gulzār bhī hai

farozāñ karke dekhe sham-e-dil ko

patañgā paikar-e-anvār bhī hai

kamāl-e-āgahī par marne vaalo

kamāl-e-āgahī āzār bhī hai

tamāsha ban gayā jis kā tahayyur

nazar vo lā.eq-e-dīdār bhī hai

go laakh ārām ho kunj-e-qafas meñ

asīrī ruuh kā āzār bhī hai

yahāñ shām-o-sahar bikte haiñ yūsuf

ye duniyā misr kā bāzār bhī hai

jo dil hai zāmin-e-mehr-o-mohabbat

vahī dil bānī-e-paikār bhī hai

vo 'sābir' naam hai rindoñ meñ jis kā

sunā hai mahram-e-asrār bhī hai

mohabbat phul bhi hai KHar bhi hai

ye virana bhi hai gulzar bhi hai

farozan karke dekhe sham-e-dil ko

patanga paikar-e-anwar bhi hai

kamal-e-agahi par marne walo

kamal-e-agahi aazar bhi hai

tamasha ban gaya jis ka tahayyur

nazar wo laeq-e-didar bhi hai

go lakh aaram ho kunj-e-qafas mein

asiri ruh ka aazar bhi hai

yahan sham-o-sahar bikte hain yusuf

ye duniya misr ka bazar bhi hai

jo dil hai zamin-e-mehr-o-mohabbat

wahi dil bani-e-paikar bhi hai

wo 'sabir' nam hai rindon mein jis ka

suna hai mahram-e-asrar bhi hai