mohabbat rahnuma apni mohabbat rahbar apni

mohabbat rahnumā apnī mohabbat rāhbar apnī

udhar niklī tirī manzil jidhar uTThī nazar apnī

dil-e-be-jazb apnā hai na āh-e-be-asar apnī

in ā.īno meñ dekheñ vo adā.eñ jalva-gar apnī

kahāñ se lā.egī umr-e-do-roza 'ahd-e-rafta ko

kahāñ yādash-ba-ḳhair ab shaam apnī vo sahar apnī

mizaj-e-husn-e-ḳhud-bīñ ko mohabbat kī nazar samjhī

samajhte haiñ mohabbat kī nazar ko vo nazar apnī

kahāñ hai husn ko mastī meñ hosh-e-iltefāt ai dil

vo kyā apnī ḳhabar leñge nahīñ jin ko ḳhabar apnī

'zahīn' apne liye dair-o-haram donoñ barābar haiñ

jidhar se vo guzarte haiñ vahī hai rahguzar apnī

mohabbat rahnuma apni mohabbat rahbar apni

udhar nikli teri manzil jidhar uTThi nazar apni

dil-e-be-jazb apna hai na aah-e-be-asar apni

in aaino mein dekhen wo adaen jalwa-gar apni

kahan se laegi umr-e-do-roza 'ahd-e-rafta ko

kahan yaadash-ba-KHair ab sham apni wo sahar apni

mizaj-e-husn-e-KHud-bin ko mohabbat ki nazar samjhi

samajhte hain mohabbat ki nazar ko wo nazar apni

kahan hai husn ko masti mein hosh-e-iltefat ai dil

wo kya apni KHabar lenge nahin jin ko KHabar apni

'zahin' apne liye dair-o-haram donon barabar hain

jidhar se wo guzarte hain wahi hai rahguzar apni