mohabbat se tariq-e-dosti se chah se mango

mohabbat se tarīq-e-dostī se chaah se māñgo

mire sāhab kisī se dil jo māñgo raah se māñgo

ga.e farhād-o-qais un kā nazīr ik maiñ jahāñ meñ huuñ

azīzāñ ḳhair baaqī māndgāñ allāh se māñgo

ḳhat us kāfir ne qatl-e-ām kā farmāñ nikālā hai

musalmāno panāh us āfat-e-nāgāh se māñgo

agar hai azm rūm-o-zañg kī tasḳhīr kā baare

kumak tum añkhḌiyoñ apnī kī nādir-shāh se māñgo

numūd ai āshiqo gar ma.arke meñ ishq ke chāho

to māñgo tabl naale se alam-dār aah se māñgo

nazar sab kuchh paḌe uTh jaa.e ġhaflat kā agar parda

jahāñ kī diid kī ruḳhsat dil-e-āgāh se māñgo

milūñ maiñ yaar se phir aap ke dhāḌī hai aur sandal

duā.eñ shaiḳh jī pīroñ kī tum dargāh se māñgo

dimāġh us kā falak par hai abas ḳhajlat-zada hoge

miyāñ dil sunte ho bosa na tum us maah se māñgo

ma.āl-e-kār us kā ḳhaak hai juz ḳhvārī-o-zillat

amaañ ai dosto duniyā meñ hubb-e-jāh se māñgo

sivā ik māl-o-zar ke jān-o-dil hai dīn-o-īmāñ hai

tumheñ jo chāhiye is apne daulat-ḳhvāh se māñgo

liye aur gum kiye lākhoñ hī us ne ye nahīñ hotā

'muhib' dil de ke phir us shoḳh-e-be-parvāh se māñgo

mohabbat se tariq-e-dosti se chah se mango

mere sahab kisi se dil jo mango rah se mango

gae farhad-o-qais un ka nazir ek main jahan mein hun

azizan KHair baqi mandgan allah se mango

KHat us kafir ne qatl-e-am ka farman nikala hai

musalmano panah us aafat-e-nagah se mango

agar hai azm rum-o-zang ki tasKHir ka bare

kumak tum ankhDiyon apni ki nadir-shah se mango

numud ai aashiqo gar marke mein ishq ke chaho

to mango tabl nale se alam-dar aah se mango

nazar sab kuchh paDe uTh jae ghaflat ka agar parda

jahan ki did ki ruKHsat dil-e-agah se mango

milun main yar se phir aap ke dhaDi hai aur sandal

duaen shaiKH ji piron ki tum dargah se mango

dimagh us ka falak par hai abas KHajlat-zada hoge

miyan dil sunte ho bosa na tum us mah se mango

maal-e-kar us ka KHak hai juz KHwari-o-zillat

aman ai dosto duniya mein hubb-e-jah se mango

siwa ek mal-o-zar ke jaan-o-dil hai din-o-iman hai

tumhein jo chahiye is apne daulat-KHwah se mango

liye aur gum kiye lakhon hi us ne ye nahin hota

'muhib' dil de ke phir us shoKH-e-be-parwah se mango