mohabbat tujhse wabasta rahegi jawedan meri

mohabbat tujh se vābasta rahegī jāvedāñ merī

tire qissa ke pīchhe pīchhe hogī dāstāñ merī

kareñgī dekhiye ulfat meñ kyā rusvā.iyāñ merī

jahāñ suniye bas un kā tazkira aur dāstāñ merī

qayāmat meñ bhī jhūTī hogī sābit dāstāñ merī

kahegā ik jahāñ un kī vahāñ yā mehrbāñ merī

bahut kuchh quvvat-e-guftār hai ai mehrbāñ merī

magar haañ sāmne un ke nahīñ khultī zabāñ merī

qayāmat kā to din hai ek aur qissa hai tūlānī

bhalā din-bhar meñ kyūñkar ḳhatm hogī dāstāñ merī

vo rusvā-e-mohabbat huuñ rahūñgā yaad muddat tak

kahānī kī tarah har ghar meñ hogī dāstāñ merī

sunā.ūñ us gul-e-ḳhūbī ko kyoñ maiñ qalb kī hālat

bhalā nāzuk-dimāġhī sunñe degī dāstāñ merī

kahūñ kuchh to shikāyat hai rahūñ chup to musībat hai

bayāñ kyūñkar karūñ kuchh go-mago hai dāstāñ merī

akelā manzil-e-mulk-e-adam meñ zer-e-marqad huuñ

vo yūsuf huuñ nahīñ kuchh chaah kartā kārvāñ merī

ye dil meñ hai jo kuchh kahnā hai dāman thaam kar kah duuñ

vo mere haath pakḌeñge ki pakḌeñge zabāñ merī

phañsāyā daam meñ sayyād mujh ko ḳhush-bayānī ne

abas par tū ne katre qat.a karnī thī zabāñ merī

na chhūTā silsila vahshat kā jab tak jaañ rahī tan meñ

vo majnūñ huuñ ki taḳhte par hī utrīñ beḌiyāñ merī

mushabbak maiñ bhī tīr-e-āh se siine ko kar dūñgā

lahad jab tak banā.egā zamīñ par āsmāñ merī

mohabbat but-kade kī dil meñ hai aur qasd ka.aba kā

ab aage dekhiye taqdīr le jaa.e jahāñ merī

bhalā vaañ kaun pūchhegā mujhe kuchh ḳhair hai zāhid

maiñ huuñ kis meñ ki pursish hogī roz-e-imtihāñ merī

tasadduq aap ke insāf ke maiñ to na mānūñgā

ki bose ġhair ke hisse ke hoñ aur gāliyāñ merī

musannif ḳhuub kartā hai bayāñ tasnīf ko apnī

kisī din vo suneñ merī zabāñ se dāstāñ merī

fishār-e-qabr ne pahlū dabā.e ḳhuub hī mere

nayā mehmāñ thā ḳhātir kyoñ na kartā mezbāñ merī

qafas meñ phaḌphaḌāne par to par sayyād ne katre

jo muñh se boltā kuchh kaaT hī letā zabāñ merī

vo is sūrat se ba.ad-e-marg bhī mujh ko jalātī haiñ

dikhā dī sham.a ko tasvīr haath aa.ī jahāñ merī

har ik jalse meñ ab to hazrat-e-vā.iz ye kahte haiñ

agar ho band mai-ḳhāna to chal jaa.e dukāñ merī

tarīqa hai yahī kyā ai lahad mehmāñ kī ḳhātir kā

maiñ ḳhud be-dam huuñ tuḌvātī hai nāhaq haDDiyāñ merī

pasand aaya nahīñ ye roz kā jhagḌā raqīboñ kā

maiñ dil se baaz aaya jaan chhoḌo mehrbāñ merī

hazāroñ hijr meñ jaur-o-sitam tere uThā.e haiñ

jo himmat ho sañbhāl ik aah tū bhī āsmāñ merī

ye kuchh apnī zabāñ meñ kahtī haiñ jab paañv ghistā huuñ

ḳhudā kī shaan mujh se boltī haiñ beḌiyāñ merī

banāyā ishq ne yūsuf ko gard-e-kārvāñ āḳhir

ki pīchhe dil gayā pahle ga.ī tāb-o-tavāñ merī

paḌhī ai 'bazm' jab maiñ ne ġhazal kaT kaT ga.e hāsid

rahī har ma.arka meñ tez shamshīr-e-zabāñ merī

mohabbat tujh se wabasta rahegi jawedan meri

tere qissa ke pichhe pichhe hogi dastan meri

karengi dekhiye ulfat mein kya ruswaiyan meri

jahan suniye bas un ka tazkira aur dastan meri

qayamat mein bhi jhuTi hogi sabit dastan meri

kahega ek jahan un ki wahan ya mehrban meri

bahut kuchh quwwat-e-guftar hai ai mehrban meri

magar han samne un ke nahin khulti zaban meri

qayamat ka to din hai ek aur qissa hai tulani

bhala din-bhar mein kyunkar KHatm hogi dastan meri

wo ruswa-e-mohabbat hun rahunga yaad muddat tak

kahani ki tarah har ghar mein hogi dastan meri

sunaun us gul-e-KHubi ko kyon main qalb ki haalat

bhala nazuk-dimaghi sunne degi dastan meri

kahun kuchh to shikayat hai rahun chup to musibat hai

bayan kyunkar karun kuchh go-mago hai dastan meri

akela manzil-e-mulk-e-adam mein zer-e-marqad hun

wo yusuf hun nahin kuchh chah karta karwan meri

ye dil mein hai jo kuchh kahna hai daman tham kar kah dun

wo mere hath pakDenge ki pakDenge zaban meri

phansaya dam mein sayyaad mujh ko KHush-bayani ne

abas par tu ne katre qata karni thi zaban meri

na chhuTa silsila wahshat ka jab tak jaan rahi tan mein

wo majnun hun ki taKHte par hi utrin beDiyan meri

mushabbak main bhi tir-e-ah se sine ko kar dunga

lahad jab tak banaega zamin par aasman meri

mohabbat but-kade ki dil mein hai aur qasd kaba ka

ab aage dekhiye taqdir le jae jahan meri

bhala wan kaun puchhega mujhe kuchh KHair hai zahid

main hun kis mein ki pursish hogi roz-e-imtihan meri

tasadduq aap ke insaf ke main to na manunga

ki bose ghair ke hisse ke hon aur galiyan meri

musannif KHub karta hai bayan tasnif ko apni

kisi din wo sunen meri zaban se dastan meri

fishaar-e-qabr ne pahlu dabae KHub hi mere

naya mehman tha KHatir kyon na karta mezban meri

qafas mein phaDphaDane par to par sayyaad ne katre

jo munh se bolta kuchh kaT hi leta zaban meri

wo is surat se baad-e-marg bhi mujh ko jalati hain

dikha di shama ko taswir hath aai jahan meri

har ek jalse mein ab to hazrat-e-waiz ye kahte hain

agar ho band mai-KHana to chal jae dukan meri

tariqa hai yahi kya ai lahad mehman ki KHatir ka

main KHud be-dam hun tuDwati hai nahaq haDDiyan meri

pasand aaya nahin ye roz ka jhagDa raqibon ka

main dil se baz aaya jaan chhoDo mehrban meri

hazaron hijr mein jaur-o-sitam tere uThae hain

jo himmat ho sanbhaal ek aah tu bhi aasman meri

ye kuchh apni zaban mein kahti hain jab panw ghista hun

KHuda ki shan mujh se bolti hain beDiyan meri

banaya ishq ne yusuf ko gard-e-karwan aaKHir

ki pichhe dil gaya pahle gai tab-o-tawan meri

paDhi ai 'bazm' jab main ne ghazal kaT kaT gae hasid

rahi har marka mein tez shamshir-e-zaban meri