mohabbat wo maraz hai jis ka chaara ho nahin sakta

mohabbat vo maraz hai jis kā chāra ho nahīñ saktā

jigar kā ho ki dil kā zaḳhm achchhā ho nahīñ saktā

vo naala koī naala hai jo kam ho mauj-e-tūfāñ se

vo aañsū koī aañsū hai jo dariyā ho nahīñ saktā

tamāshā hai ki ham us ko masīhā dam samajhte haiñ

hamāre dard kā jis se mudāvā ho nahīñ saktā

mujhe fariyād par maa.il na kar ai josh-e-nākāmī

zamāne-bhar meñ dil kā raaz rusvā ho nahīñ saktā

ajab kyā hai jo ḳhāmoshī hī sharh-e-ārzū kar de

mire lab se to iz.hār-e-tamannā ho nahīñ saktā

mubārak ho tujhī ko ye ḳhayālistān ai vaa.iz

tirī duniyā meñ rindoñ kā guzāra ho nahīñ saktā

tamāshā ho gayā hai tere jalvoñ kā tamāshā.ī

koī is shaan se mahv-e-tamāshā ho nahīñ saktā

badal sakte ho tum bigḌī huī qismat zamāne kī

tumhārī ik nigāh-e-nāz se kyā ho nahīñ saktā

mohabbat wo maraz hai jis ka chaara ho nahin sakta

jigar ka ho ki dil ka zaKHm achchha ho nahin sakta

wo nala koi nala hai jo kam ho mauj-e-tufan se

wo aansu koi aansu hai jo dariya ho nahin sakta

tamasha hai ki hum us ko masiha dam samajhte hain

hamare dard ka jis se mudawa ho nahin sakta

mujhe fariyaad par mail na kar ai josh-e-nakaami

zamane-bhar mein dil ka raaz ruswa ho nahin sakta

ajab kya hai jo KHamoshi hi sharh-e-arzu kar de

mere lab se to izhaar-e-tamanna ho nahin sakta

mubarak ho tujhi ko ye KHayalistan ai waiz

teri duniya mein rindon ka guzara ho nahin sakta

tamasha ho gaya hai tere jalwon ka tamashai

koi is shan se mahw-e-tamasha ho nahin sakta

badal sakte ho tum bigDi hui qismat zamane ki

tumhaari ek nigah-e-naz se kya ho nahin sakta