mohabbaten bhi likhi hui hain adawaten bhi likhi hui hain

mohabbateñ bhī likhī huī haiñ adāvateñ bhī likhī huī haiñ

kitāb-e-dil meñ to jiine marne kī muddateñ bhī likhī huī haiñ

barahna peḌoñ ke zāviyoñ meñ ghane añdhere uge haiñ lekin

inhī añdheroñ meñ raushnī kī ibārateñ bhī likhī huī haiñ

yahī zamīñ hai ki jis ne mujh ko mirā hī qātil banā diyā hai

isī zamīñ par mire lahū kī shahādateñ bhī likhī huī haiñ

hanūt chehroñ ke ā.inoñ meñ havā kī lahroñ ne ye bhī dekhā

khañDar khañDar par na.e dinoñ kī bashārateñ bhī likhī huī haiñ

mirī nazar meñ surāġh-e-manzil shu.ūr ban kar chamak rahā hai

mirī jabīñ par kaḌe safar kī masāfateñ bhī likhī huī haiñ

sitam ke māroñ kī be-hisī ko tamāshā-gāhoñ meñ laane vaalo

nahīf jismoñ kī bebasī meñ baġhāvateñ bhī likhī huī haiñ

jadīd harfoñ ke dā.eroñ meñ purānī ḳhushbū rachī huī hai

sadā ke ruḳh par ga.ī rutoñ kī shabāhateñ bhī likhī huī haiñ

zamīñ kī ThanDī tahoñ ke andar alaav karvaT badal rahe haiñ

havā ke sākit pane pe 'at.har' qayāmateñ bhī likhī huī haiñ

mohabbaten bhi likhi hui hain adawaten bhi likhi hui hain

kitab-e-dil mein to jine marne ki muddaten bhi likhi hui hain

barahna peDon ke zawiyon mein ghane andhere uge hain lekin

inhi andheron mein raushni ki ibaraten bhi likhi hui hain

yahi zamin hai ki jis ne mujh ko mera hi qatil bana diya hai

isi zamin par mere lahu ki shahadaten bhi likhi hui hain

hanut chehron ke aainon mein hawa ki lahron ne ye bhi dekha

khanDar khanDar par nae dinon ki bashaaraten bhi likhi hui hain

meri nazar mein suragh-e-manzil shuur ban kar chamak raha hai

meri jabin par kaDe safar ki masafaten bhi likhi hui hain

sitam ke maron ki be-hisi ko tamasha-gahon mein lane walo

nahif jismon ki bebasi mein baghawaten bhi likhi hui hain

jadid harfon ke daeron mein purani KHushbu rachi hui hai

sada ke ruKH par gai ruton ki shabahaten bhi likhi hui hain

zamin ki ThanDi tahon ke andar alaw karwaT badal rahe hain

hawa ke sakit pane pe 'athar' qayamaten bhi likhi hui hain