mohabbaton ka chaman paemal humne kiya

mohabbatoñ kā chaman pā.emāl ham ne kiyā

ḳhud apne aap kā jiinā muhāl ham ne kiyā

jo lazzateñ haiñ dukhoñ meñ masarratoñ meñ kahāñ

milā uruuj to us ko zavāl ham ne kiyā

na kār-e-dil ke the laa.eq na kār-e-duniyā ke

jo kuchh kiyā to ġham-e-māh-o-sāl ham ne kiyā

hazār dard ke mausam guzar ga.e lekin

kabhī darāz na dast-e-savāl ham ne kiyā

ye ramz-e-ishq ye nāzuk kinā.e ham ne sikhā.e

nigāh-e-nāz tujhe be-misāl ham ne kiyā

diye tarāsh liye yaas ke añdheroñ se

ġham-e-firāq ko ḳhvāb-e-visāl ham ne kiyā

suḳhan se rañg gayā zindagī se ḳhvāb ga.e

ye zaḳhm hijr kā kyuuñ indimāl ham ne kiyā

huī hai aaj tabī.at suḳhan pe phir maa.il

so mauj-e-dard ko dil meñ bahāl ham ne kiyā

mohabbaton ka chaman paemal hum ne kiya

KHud apne aap ka jina muhaal hum ne kiya

jo lazzaten hain dukhon mein masarraton mein kahan

mila uruj to us ko zawal hum ne kiya

na kar-e-dil ke the laeq na kar-e-duniya ke

jo kuchh kiya to gham-e-mah-o-sal hum ne kiya

hazar dard ke mausam guzar gae lekin

kabhi daraaz na dast-e-sawal hum ne kiya

ye ramz-e-ishq ye nazuk kinae hum ne sikhae

nigah-e-naz tujhe be-misal hum ne kiya

diye tarash liye yas ke andheron se

gham-e-firaq ko KHwab-e-visal hum ne kiya

suKHan se rang gaya zindagi se KHwab gae

ye zaKHm hijr ka kyun indimal hum ne kiya

hui hai aaj tabiat suKHan pe phir mail

so mauj-e-dard ko dil mein bahaal hum ne kiya