mohabbaton ka KHaridar DhunDne nikla

mohabbatoñ kā ḳharīdār DhūñDne niklā

ḳhudā ḳhud aaj gunahgār DhūñDne niklā

kuchh is qadar thā añdherā ki sub.h kā sūraj

hamāre kūcha-o-bāzār DhūñDne niklā

mirī tarah kī farāsat hai kis ke paas ki maiñ

jo shahr ho gayā mismār DhūñDne niklā

badan kī dhuup ne vo haal kar diyā hai ki maiñ

ridā-e-sāya-e-ashjār DhūñDne niklā

ajiib majlis-e-ahl-e-kamāl hai ki yahāñ

har ek apnā taraf-dār DhūñDne niklā

na.ī sadī meñ purānī sadī kā sailānī

guzishta ahd ke āsār DhūñDne niklā

lab-e-furāt vo manzar thā dīdanī 'mohsin'

jab ik savār ko rahvār DhūñDne niklā

mohabbaton ka KHaridar DhunDne nikla

KHuda KHud aaj gunahgar DhunDne nikla

kuchh is qadar tha andhera ki subh ka suraj

hamare kucha-o-bazar DhunDne nikla

meri tarah ki farasat hai kis ke pas ki main

jo shahr ho gaya mismar DhunDne nikla

badan ki dhup ne wo haal kar diya hai ki main

rida-e-saya-e-ashjar DhunDne nikla

ajib majlis-e-ahl-e-kamal hai ki yahan

har ek apna taraf-dar DhunDne nikla

nai sadi mein purani sadi ka sailani

guzishta ahd ke aasar DhunDne nikla

lab-e-furaat wo manzar tha didani 'mohsin'

jab ek sawar ko rahwar DhunDne nikla