mohabbaton ke hasin palon ko wo titliyon ka KHayal dega

mohabbatoñ ke hasīñ paloñ ko vo titliyoñ kā ḳhayāl degā

ki ḳhvāb saare bas ek shab meñ vo merī āñkhoñ meñ Dhaal degā

maiñ ruuTh jā.ūñgī laakh us se mujhe manā hī vo legā āḳhir

qarīb aa kar yā muskurā kar mizāj merā sañbhāl degā

jo pal bhī bītegā qurbatoñ meñ hasīn chanchal sī chāhatoñ meñ

mujhe yaqīñ hai ki merā dilbar vo mere maazī ko haal degā

jo shaḳhs bechāra hai aaj mujh se bahār-mausam kī ibtidā meñ

kahā thā us ne ki chāhatoñ ko kabhī na rang-e-zavāl degā

ki le ke ambar se vo sitāre jo mere āñchal sajā rahā thā

kise patā thā ki vo hī āñchal vo merī arthī pe Daal degā

mohabbaton ke hasin palon ko wo titliyon ka KHayal dega

ki KHwab sare bas ek shab mein wo meri aankhon mein Dhaal dega

main ruTh jaungi lakh us se mujhe mana hi wo lega aaKHir

qarib aa kar ya muskura kar mizaj mera sanbhaal dega

jo pal bhi bitega qurbaton mein hasin chanchal si chahaton mein

mujhe yaqin hai ki mera dilbar wo mere mazi ko haal dega

jo shaKHs bechaara hai aaj mujh se bahaar-mausam ki ibtida mein

kaha tha us ne ki chahaton ko kabhi na rang-e-zawal dega

ki le ke ambar se wo sitare jo mere aanchal saja raha tha

kise pata tha ki wo hi aanchal wo meri arthi pe Dal dega