mohabbaton ki kitab mein jo likha hua hai wo shairi hai

mohabbatoñ kī kitāb meñ jo likhā huā hai vo shā'irī hai

yaqīn maano nazar se ojhal jo ho gayā hai vo shā'irī hai

maiñ phuul shabnam se mil ke aayā bahut satā.e hue haiñ ye bhī

jo zaḳhm kāñToñ se khaa.e sab ne mujhe pata hai vo shā'irī hai

mujhe ḳhabar hai mujhe pata hai du'ā se baḌh kar nahīñ hai kuchh bhī

magar maiñ ye bhī to jāntā huuñ jo ratjagā hai vo shā'irī hai

maiñ lauT aayā huuñ qatl-gah se nahīñ hai koī masīhā merā

jo girte girte mujhe sañbhāle mujhe pata hai vo shā'irī hai

bhaTak rahā huuñ maiñ sahrā sahrā na jaane kis kī talāsh meñ ab

jo mil gayā hai nasīb merā jo rah gayā hai vo shā'irī hai

gulāb champā chañbelī nargis haiñ mogrā bhī chaman meñ lekin

vo jis kī ḳhushbū se saarā 'ālam mahak rahā hai vo shā'irī hai

jo mere hisse meñ likh diyā hai hai merā īmāñ mujhe milegā

magar maiñ kaise batā.ūñ tum ko jo kuchh bachā hai vo shā'irī hai

qadam qadam par jo saath mere chalā hai us ko batā.ūñ kaise

suḳhanvaroñ kī jo Thokaroñ meñ paḌā huā hai vo shā'irī hai

mujhe na dā'vā hai shā'irī kā na huuñ maiñ shā'ir qasam ḳhudā kī

jo 'mīr'-o-'ġhālib' 'farāz' 'hasrat' ne likh diyā hai vo shā'irī hai

vo thartharāte se hoñT us ke ġhazāl āñkhoñ pe zulfeñ us kī

hasīn manzar ko dekh kar vo jo likh rahā hai vo shā'irī hai

use zamāne kā ḳhauf kyā ho ki jis pe 'ahmad' karam ho us kā

basā ho jis ke ḳhayāl meñ rab mujhe pata hai vo shā'irī hai

mohabbaton ki kitab mein jo likha hua hai wo sha'iri hai

yaqin mano nazar se ojhal jo ho gaya hai wo sha'iri hai

main phul shabnam se mil ke aaya bahut satae hue hain ye bhi

jo zaKHm kanTon se khae sab ne mujhe pata hai wo sha'iri hai

mujhe KHabar hai mujhe pata hai du'a se baDh kar nahin hai kuchh bhi

magar main ye bhi to jaanta hun jo ratjaga hai wo sha'iri hai

main lauT aaya hun qatl-gah se nahin hai koi masiha mera

jo girte girte mujhe sanbhaale mujhe pata hai wo sha'iri hai

bhaTak raha hun main sahra sahra na jaane kis ki talash mein ab

jo mil gaya hai nasib mera jo rah gaya hai wo sha'iri hai

gulab champa chanbeli nargis hain mogra bhi chaman mein lekin

wo jis ki KHushbu se sara 'alam mahak raha hai wo sha'iri hai

jo mere hisse mein likh diya hai hai mera iman mujhe milega

magar main kaise bataun tum ko jo kuchh bacha hai wo sha'iri hai

qadam qadam par jo sath mere chala hai us ko bataun kaise

suKHanwaron ki jo Thokaron mein paDa hua hai wo sha'iri hai

mujhe na da'wa hai sha'iri ka na hun main sha'ir qasam KHuda ki

jo 'mir'-o-'ghaalib' 'faraaz' 'hasrat' ne likh diya hai wo sha'iri hai

wo thartharaate se honT us ke ghazal aankhon pe zulfen us ki

hasin manzar ko dekh kar wo jo likh raha hai wo sha'iri hai

use zamane ka KHauf kya ho ki jis pe 'ahmad' karam ho us ka

basa ho jis ke KHayal mein rab mujhe pata hai wo sha'iri hai