mohabbaton ki masafat se kaT ke dekhte kya

mohabbatoñ kī masāfat se kaT ke dekhte kyā

musāfir-e-shab-e-hijrāñ palaT ke dekhte kyā

surūr-e-ishq meñ gum ho ga.e the ham donoñ

havā-e-dāman-e-shab se lipaT ke dekhte kyā

tilism-e-yār rag o pai meñ Dhal rahā thaa, ham

nashāt o ġham ke sahīfe ulaT ke dekhte kyā

bahār-e-nau ko janam de rahī thī vasl kī shab

ham āfiyat kī rutoñ meñ simaT ke dekhte kyā

thā sail-e-hasrat-e-dil dushman-e-hayāt magar

rah-e-baqā bhī usī meñ thī haT ke dekhte kyā

mohabbaton ki masafat se kaT ke dekhte kya

musafir-e-shab-e-hijran palaT ke dekhte kya

surur-e-ishq mein gum ho gae the hum donon

hawa-e-daman-e-shab se lipaT ke dekhte kya

tilism-e-yar rag o pai mein Dhal raha tha, hum

nashat o gham ke sahife ulaT ke dekhte kya

bahaar-e-nau ko janam de rahi thi wasl ki shab

hum aafiyat ki ruton mein simaT ke dekhte kya

tha sail-e-hasrat-e-dil dushman-e-hayat magar

rah-e-baqa bhi usi mein thi haT ke dekhte kya