محبتوں میں ہتھیلی پہ لے کے سر آئے

محبتوں میں ہتھیلی پہ لے کے سر آئے

بلا کشان جنوں کیسے بے خطر آئے

تلاش وہ کرے خوشیاں کہ شوق ہے اس کا

غموں کو لے کے جیوں مجھ کو یہ ہنر آئے

میں جاگوں خواب سے تو سامنے اسے دیکھوں

مرے نصیب میں ایسی کوئی سحر آئے

ذلیل کر ہی دیا اس نے میرے جذبوں کو

وہ جس پہ ہم تو سبھی کچھ نثار کر آئے

یہ جرم مجھ سے ہوا تھا سزا بھی میں بھگتوں

تمام عشق کے الزام میرے سر آئے

یہ کیا کہ آنکھوں کی راہوں سے دل میں آتا ہے

کبھی سڑک سے گزر کر ہمارے گھر آئے