محبتوں میں تو سوداگری نہیں ہوتی

محبتوں میں تو سوداگری نہیں ہوتی

دل نہال میں لالچ بھری نہیں ہوتی

حریم غیب کا پردہ نہیں اٹھا سکتا

اب اس قدر بھی نظر پروری نہیں ہوتی

ہم اہل ہجر پہ ہجرت کی حد نہ جاری کر

کہ بے گھروں کی سزا بے گھری نہیں ہوتی

بہار باغ میں آتی نہیں کبھی اک دم

ہر ایک شاخ اچانک ہری نہیں ہوتی

میں آدمی ہوں فرشتہ نہیں تو حیرت کیا

کسی کی مجھ سے اگر مخبری نہیں ہوتی

یہ اور بات کہ ہو مختصر مگر عاصمؔ

ہماری بات کبھی سرسری نہیں ہوتی