muaf kar meri masti KHuda-e-azza-wa-jal

mu'āf kar mirī mastī ḳhudā-e-azza-va-jal

ki mere haath meñ sāġhar hai mere lab pe ġhazal

karīm hai to mirī laġhzishoñ ko pyaar se dekh

rahīm hai to sazā-o-jazā kī had se nikal

hai dostī to mujhe izn-e-mezbānī de

tū āsmāñ se utar aur mirī zamīn pe chal

maiñ pā-ba-gil huuñ magar chhū chukā mināra-e-'arsh

so tū bhī dekh ye ḳhāk-o-ḳhashāra-o-jangal

bahut 'azīz hai mujh ko ye ḳhāk-dāñ merā

ye kohsār ye qulzum ye dasht ye daldal

mire jahāñ meñ zamān-o-makān-o-lail-o-nahār

tire jahāñ meñ azal hai abad na aaj na kal

mire lahū meñ hai barq-e-tapāñ kā jazb-o-gurez

tire subū meñ mai-e-zindagī na zahr-e-ajal

tirī bahisht hai dasht-e-jumūd-o-bahr-e-sukūt

mirī sarisht hai āshob-e-zāt se bekal

tū apne 'arsh pe shādāñ hai so ḳhushī terī

maiñ apne farsh pe nāzāñ huuñ ai nigār-e-azal

mujhe na jannat-e-gum-gashta kī bashārat de

ki mujh ko yaad abhī tak hai hijrat-e-avval

tire karam se yahāñ bhī mujhe mayassar hai

jo zāhidoñ kī 'ibādat meñ Dāltā hai ḳhalal

vo sair-chashm huuñ mere liye hai be-vaq'at

jamāl-e-hūr-o-sharāb-tahūr-o-shīr-o-‘asal

gunāhgār to huuñ par na is qadar ki mujhe

salīb roz-e-mukāfāt kī lage bojhal

kahīñ kahīñ koī laala kahīñ kahīñ koī daaġh

mirī bayāz kī sūrat hai merī fard-e-amal

vo tū ki ‘uqda-kushā-o-musabbib-ul-asbāb

ye maiñ ki aap mo'amma huuñ aap apnā hī hal

maiñ aap apnā hī hābīl apnā hī qābīl

mirī hī zaat hai maqtūl-o-qātil-o-maqtal

baras baras kī tarah thā nafas nafas merā

sadī sadī kī tarah kāTtā rahā pal pal

tirā vajūd hai lā-raib ashraf-o-ā’lā

jo sach kahūñ to nahīñ maiñ bhī arzal-o-asfal

ye vāqi’a hai ki shā'ir vo dekh saktā hai

rahe jo tere farishtoñ kī aañkh se ojhal

vo par-fishāñ haiñ magar ġhol-e-shapparak kī tarah

so rā.egāñ haiñ ki juuñ chashm-e-kor meñ kājal

mire liye to hai sau baḳhshishoñ kī ik baḳhshish

qalam jo afsar-o-tabl-o-‘alam se hai afzal

yahī qalam hai ki jis kī sitāra-sāzī se

diloñ meñ jot jagātī hai 'ishq kī mash'al

yahī qalam hai jo dukh kī rutoñ meñ baḳhshtā hai

diloñ ko pyaar kā marham sukūn kā sandal

yahī qalam hai ki e’jāz-e-harf se jis ke

tamām ‘ishva-tarāzān-e-shahr haiñ pāgal

yahī qalam hai ki jis ne mujhe ye dars diyā

ki sang-o-ḳhisht kī zad par raheñge shīsh-mahal

yahī qalam hai ki jis kī sarīr ke aage

haiñ surma dar-gulū ḳhūñḳhār lashkaroñ ke bigal

yahī qalam hai ki jis ke hunar se nikle haiñ

rah-e-hayāt ke ḳham hoñ ki zulf-e-yār ke bal

yahī qalam hai ki jis kī 'atā se mujh ko mile

ye chāhatoñ ke shagūfe mohabbatoñ ke kañval

tamām sīna-figāroñ ko yaad mere suḳhan

har ek ġhairat-e-mariyam ke lab pe merī ġhazal

isī ne sahl kiye mujh pe zindagī ke 'azāb

vo ahd-e-sang-zanī thā ki daur-e-teġh-e-ajal

isī ne mujh ko sujhā.ī hai rāh-e-ahl-e-safā

isī ne mujh se kahā hai pul-e-sirāt pe chal

isī ne mujh ko chaTānoñ ke hausle baḳhshe

vo karbalā-e-fanā thī ki kārgāh-e-jadal

isī ne mujh se kahā ism-e-ahl-e-sidq amar

isī ne mujh se kahā sach kā faisla hai aTal

isī ke faiz se ātish-kade hue gulzār

isī ke lutf se har zisht ban gayā ajmal

isī ne mujh se kahā jo milā bahut kuchh hai

isī ne mujh se kahā jo nahīñ hai haath na mal

isī ne mujh ko qanā'at kā boriyā baḳhshā

isī ke haath se dast-e-darāz-e-tam’ hai shal

isī kī aag se merā vajūd raushan hai

isī kī aab se merā zamīr hai saiqal

isī ne mujh se kahā bai'at-e-yazīd na kar

isī ne mujh se kahā maslak-e-husain pe chal

isī ne mujh se kahā zahr kā piyāla uThā

isī ne mujh se kahā jo kahā hai us se na Tal

isī ne mujh se kahā ‘ājizī se maat na khā

isī ne mujh se kahā maslahat kī chaal na chal

isī ne mujh se kahā ġhairat-e-suḳhan ko na bech

ki ḳhūn-e-dil ke sharaf ko na ashrafī se badal

isī ne mujh ko 'ināyat kiyā yad-e-baizā

isī ne mujh se kahā sehr-e-sāmrī se nikal

isī ne mujh se kahā 'aql tah-nashīnī hai

isī ne mujh se kahā varta-e-ḳhirad se nikal

isī ne mujh se kahā vaz'-e-'āshiqī ko na chhoḌ

vo ḳhvāh 'ijz kā lamha ho yā ġhurūr kā pal

aziyyatoñ meñ bhī baḳhshī mujhe vo ne'mat-e-sabr

ki mere dil meñ girah hai na mere māthe pe bal

haiñ sabt sīna-e-mahtāb par qadam mere

haiñ muntazir mire mirrīḳh-o-mushtarī-o-zuhal

tirī 'atā ke sabab yā merī anā ke sabab

kisī du'ā kā hai mauqa na iltijā kā mahal

so tujh sā hai koī ḳhāliq na mujh sī hai maḳhlūq

na koī terā hai saanī na koī merā badal

'farāz' tū bhī junūñ meñ kidhar gayā hai nikal

tirā dayār mohabbat tirī nigār ġhazal

qaaf

Tapak chukā hai bahut terī aañkh se ḳhūñ-nāb

baras chukā hai bahut tere dard kā bādal

kuchh aur der abhī hasrat-e-visāl meñ rah

kuchh aur der abhī ātish-e-firāq meñ jal

kisī bahār-e-shimā.il kī baat kar ki bane

har ek harf shagūfa har ek lafz kañval

mu'af kar meri masti KHuda-e-azza-wa-jal

ki mere hath mein saghar hai mere lab pe ghazal

karim hai to meri laghzishon ko pyar se dekh

rahim hai to saza-o-jaza ki had se nikal

hai dosti to mujhe izn-e-mezbani de

tu aasman se utar aur meri zamin pe chal

main pa-ba-gil hun magar chhu chuka minara-e-'arsh

so tu bhi dekh ye KHak-o-KHashaara-o-jangal

bahut 'aziz hai mujh ko ye KHak-dan mera

ye kohsar ye qulzum ye dasht ye daldal

mere jahan mein zaman-o-makan-o-lail-o-nahaar

tere jahan mein azal hai abad na aaj na kal

mere lahu mein hai barq-e-tapan ka jazb-o-gurez

tere subu mein mai-e-zindagi na zahr-e-ajal

teri bahisht hai dasht-e-jumud-o-bahr-e-sukut

meri sarisht hai aashob-e-zat se bekal

tu apne 'arsh pe shadan hai so KHushi teri

main apne farsh pe nazan hun ai nigar-e-azal

mujhe na jannat-e-gum-gashta ki bashaarat de

ki mujh ko yaad abhi tak hai hijrat-e-awwal

tere karam se yahan bhi mujhe mayassar hai

jo zahidon ki 'ibaadat mein Dalta hai KHalal

wo sair-chashm hun mere liye hai be-waq'at

jamal-e-hur-o-sharab-tahur-o-shir-o-‘asal

gunahgar to hun par na is qadar ki mujhe

salib roz-e-mukafat ki lage bojhal

kahin kahin koi lala kahin kahin koi dagh

meri bayaz ki surat hai meri fard-e-amal

wo tu ki ‘uqda-kusha-o-musabbib-ul-asbab

ye main ki aap mo'amma hun aap apna hi hal

main aap apna hi habil apna hi qabil

meri hi zat hai maqtul-o-qatil-o-maqtal

baras baras ki tarah tha nafas nafas mera

sadi sadi ki tarah kaTta raha pal pal

tera wajud hai la-raib ashraf-o-a’la

jo sach kahun to nahin main bhi arzal-o-asfal

ye waqi’a hai ki sha'ir wo dekh sakta hai

rahe jo tere farishton ki aankh se ojhal

wo par-fishan hain magar ghol-e-shapparak ki tarah

so raegan hain ki jun chashm-e-kor mein kajal

mere liye to hai sau baKHshishon ki ek baKHshish

qalam jo afsar-o-tabl-o-‘alam se hai afzal

yahi qalam hai ki jis ki sitara-sazi se

dilon mein jot jagati hai 'ishq ki mash'al

yahi qalam hai jo dukh ki ruton mein baKHshta hai

dilon ko pyar ka marham sukun ka sandal

yahi qalam hai ki e’jaz-e-harf se jis ke

tamam ‘ishwa-taraazan-e-shahr hain pagal

yahi qalam hai ki jis ne mujhe ye dars diya

ki sang-o-KHisht ki zad par rahenge shish-mahal

yahi qalam hai ki jis ki sarir ke aage

hain surma dar-gulu KHunKHar lashkaron ke bigal

yahi qalam hai ki jis ke hunar se nikle hain

rah-e-hayat ke KHam hon ki zulf-e-yar ke bal

yahi qalam hai ki jis ki 'ata se mujh ko mile

ye chahaton ke shagufe mohabbaton ke kanwal

tamam sina-figaron ko yaad mere suKHan

har ek ghairat-e-mariyam ke lab pe meri ghazal

isi ne sahl kiye mujh pe zindagi ke 'azab

wo ahd-e-sang-zani tha ki daur-e-tegh-e-ajal

isi ne mujh ko sujhai hai rah-e-ahl-e-safa

isi ne mujh se kaha hai pul-e-siraat pe chal

isi ne mujh ko chaTanon ke hausle baKHshe

wo karbala-e-fana thi ki kargah-e-jadal

isi ne mujh se kaha ism-e-ahl-e-sidq amar

isi ne mujh se kaha sach ka faisla hai aTal

isi ke faiz se aatish-kade hue gulzar

isi ke lutf se har zisht ban gaya ajmal

isi ne mujh se kaha jo mila bahut kuchh hai

isi ne mujh se kaha jo nahin hai hath na mal

isi ne mujh ko qana'at ka boriya baKHsha

isi ke hath se dast-e-daraaz-e-tam’ hai shal

isi ki aag se mera wajud raushan hai

isi ki aab se mera zamir hai saiqal

isi ne mujh se kaha bai'at-e-yazid na kar

isi ne mujh se kaha maslak-e-husain pe chal

isi ne mujh se kaha zahr ka piyala uTha

isi ne mujh se kaha jo kaha hai us se na Tal

isi ne mujh se kaha ‘ajizi se mat na kha

isi ne mujh se kaha maslahat ki chaal na chal

isi ne mujh se kaha ghairat-e-suKHan ko na bech

ki KHun-e-dil ke sharaf ko na ashrafi se badal

isi ne mujh ko 'inayat kiya yad-e-baiza

isi ne mujh se kaha sehr-e-samri se nikal

isi ne mujh se kaha 'aql tah-nashini hai

isi ne mujh se kaha warta-e-KHirad se nikal

isi ne mujh se kaha waz'-e-'ashiqi ko na chhoD

wo KHwah 'ijz ka lamha ho ya ghurur ka pal

aziyyaton mein bhi baKHshi mujhe wo ne'mat-e-sabr

ki mere dil mein girah hai na mere mathe pe bal

hain sabt sina-e-mahtab par qadam mere

hain muntazir mere mirriKH-o-mushtari-o-zuhal

teri 'ata ke sabab ya meri ana ke sabab

kisi du'a ka hai mauqa na iltija ka mahal

so tujh sa hai koi KHaliq na mujh si hai maKHluq

na koi tera hai sani na koi mera badal

'faraaz' tu bhi junun mein kidhar gaya hai nikal

tera dayar mohabbat teri nigar ghazal

qaf

Tapak chuka hai bahut teri aankh se KHun-nab

baras chuka hai bahut tere dard ka baadal

kuchh aur der abhi hasrat-e-visal mein rah

kuchh aur der abhi aatish-e-firaq mein jal

kisi bahaar-e-shimail ki baat kar ki bane

har ek harf shagufa har ek lafz kanwal