mubarak baada-KHwaron ko ki din sawan ke aate hain

mubārak bāda-ḳhvāroñ ko ki din sāvan ke aate haiñ

havā badlī hai bādal rīsh-e-qāzī ban ke aate haiñ

tumhāre tiir rag rag meñ rag-e-jāñ ban ke aate haiñ

gale se siine meñ siine se dil meñ chhan ke aate haiñ

junūñ meñ dil se maiñ sadqe tirī rozī-risānī ke

ki mere sāmne TukḌe mire dāman ke aate haiñ

bahut bikhrī huī zulfeñ nazar aatī haiñ rāhoñ meñ

bahut bikte hue phande mirī gardan ke aate haiñ

tirī hasrat jab aatī hai musībat ho ke aatī hai

tire armān jab aate haiñ dushman ban ke aate haiñ

ġhazab hai muft dil lenā aur us par yuuñ ulajh paḌnā

ki goyā daam mujh par gesū-e-pur-fan ke aate haiñ

bahāna kosne kā mil gayā hai fātiha kaisī

vo donoñ haath uThā.e sāmne madfan ke aate haiñ

laḌakpan dekhnā kahne lage dekhā jo ā.īna

khilaune kitne ko is rang is roġhan ke aate haiñ

bigaḌne ke liye zulfeñ haiñ luTne ke liye joban

mirā māthā Thanaktā hai vo jab ban Than ke aate haiñ

dil-e-betāb merā dūsrā ma.ashūq hai goyā

use andāz un kī chulbulī chitvan ke aate haiñ

tire paikāñ ghule jaate haiñ mere shīsha-e-dil meñ

araq ho ho ke rahte haiñ parī ban ban ke aate haiñ

ye matlab hai ki ye tasvīr-e-kohna tum se behtar hai

ticket chaspāñ tumhāre naam ḳhat dushman ke aate haiñ

ilāhī un kā jalva hai ki parda chashm-e-'rāsiḳh' kā

chamak jaatī hai bijlī paas jab chilman ke aate haiñ

mubarak baada-KHwaron ko ki din sawan ke aate hain

hawa badli hai baadal rish-e-qazi ban ke aate hain

tumhaare tir rag rag mein rag-e-jaan ban ke aate hain

gale se sine mein sine se dil mein chhan ke aate hain

junun mein dil se main sadqe teri rozi-risani ke

ki mere samne TukDe mere daman ke aate hain

bahut bikhri hui zulfen nazar aati hain rahon mein

bahut bikte hue phande meri gardan ke aate hain

teri hasrat jab aati hai musibat ho ke aati hai

tere arman jab aate hain dushman ban ke aate hain

ghazab hai muft dil lena aur us par yun ulajh paDna

ki goya dam mujh par gesu-e-pur-fan ke aate hain

bahana kosne ka mil gaya hai fatiha kaisi

wo donon hath uThae samne madfan ke aate hain

laDakpan dekhna kahne lage dekha jo aaina

khilaune kitne ko is rang is roghan ke aate hain

bigaDne ke liye zulfen hain luTne ke liye joban

mera matha Thanakta hai wo jab ban Than ke aate hain

dil-e-betab mera dusra mashuq hai goya

use andaz un ki chulbuli chitwan ke aate hain

tere paikan ghule jate hain mere shisha-e-dil mein

araq ho ho ke rahte hain pari ban ban ke aate hain

ye matlab hai ki ye taswir-e-kohna tum se behtar hai

ticket chaspan tumhaare nam KHat dushman ke aate hain

ilahi un ka jalwa hai ki parda chashm-e-'rasiKH' ka

chamak jati hai bijli pas jab chilman ke aate hain