mubtala KHud ko kisi gham mein musalsal rakhna

mubtalā ḳhud ko kisī ġham meñ musalsal rakhnā

aur us ġham ko tirī aañkh se ojhal rakhnā

chāñd khiḌkī meñ kabhī dhuup meñ bādal rakhnā

dhyān rakhnā jo kisī kā to har ik pal rakhnā

chalnā sīkhā hī nahīñ raah se haT kar ham ne

ik qadam us kī taraf ik sū-e-maqtal rakhnā

dekhnā maañd na paḌ jaa.eñ ġham-e-hijr meñ ye

tum shab-e-vasl kā in āñkhoñ meñ kājal rakhnā

ik zarā baat se is jaan pe ban aatī thī

raas aayā bhī to ġham se ise bojhal rakhnā

jis ko kahnā thā usī ko nahīñ kahnā aur phir

kaise andeshoñ meñ ḳhud ko yūñhī pāgal rakhnā

aisā lagnā ki ye āñkheñ to barastī hī nahīñ

sail-e-ġham se magar andar koī jal-thal rakhnā

ham to is arsa-e-hastī meñ jhulaste hī rahe

na huā dhuup meñ ik ḳhvāb kā bādal rakhnā

mubtala KHud ko kisi gham mein musalsal rakhna

aur us gham ko teri aankh se ojhal rakhna

chand khiDki mein kabhi dhup mein baadal rakhna

dhyan rakhna jo kisi ka to har ek pal rakhna

chalna sikha hi nahin rah se haT kar hum ne

ek qadam us ki taraf ek su-e-maqtal rakhna

dekhna mand na paD jaen gham-e-hijr mein ye

tum shab-e-wasl ka in aankhon mein kajal rakhna

ek zara baat se is jaan pe ban aati thi

ras aaya bhi to gham se ise bojhal rakhna

jis ko kahna tha usi ko nahin kahna aur phir

kaise andeshon mein KHud ko yunhi pagal rakhna

aisa lagna ki ye aankhen to barasti hi nahin

sail-e-gham se magar andar koi jal-thal rakhna

hum to is arsa-e-hasti mein jhulaste hi rahe

na hua dhup mein ek KHwab ka baadal rakhna