muD ke dekhun to nahin koi magar lagta hai

muḌ ke dekhūñ to nahīñ koī magar lagtā hai

ek saaya sā pas-e-gard-e-safar lagtā hai

kaan dhartā huuñ to hotī hai samā.at majrūh

apnī hī ḳhvāhish-e-be-bāk se Dar lagtā hai

is tamāshe se nikal paañv to ghar bhī dekhūñ

ye tamāsha jo sar-e-rāhguzar lagtā hai

niiñd aa jaa.e to phir dhuup na saaya koī

paañv thak jaa.eñ to pardes bhī ghar lagtā hai

aañkh uThātā huuñ to hai raah meñ haa.il dīvār

paañv rakhtā huuñ to dīvār meñ dar lagtā hai

kyā qayāmat hai ki aatā hai na jaatā hai koī

ik hayūlā pas-e-dīvār magar lagtā hai

baat kartā huuñ to maḳhmūr sā ho jaatā huuñ

us kī bātoñ meñ 'ziyā' mai kā asar lagtā hai

muD ke dekhun to nahin koi magar lagta hai

ek saya sa pas-e-gard-e-safar lagta hai

kan dharta hun to hoti hai samaat majruh

apni hi KHwahish-e-be-bak se Dar lagta hai

is tamashe se nikal panw to ghar bhi dekhun

ye tamasha jo sar-e-rahguzar lagta hai

nind aa jae to phir dhup na saya koi

panw thak jaen to pardes bhi ghar lagta hai

aankh uThata hun to hai rah mein hail diwar

panw rakhta hun to diwar mein dar lagta hai

kya qayamat hai ki aata hai na jata hai koi

ek hayula pas-e-diwar magar lagta hai

baat karta hun to maKHmur sa ho jata hun

us ki baaton mein 'ziya' mai ka asar lagta hai