muddaa kya zaban se nikla

mudda.ā kyā zabān se niklā

tiir thā jo kamān se niklā

dil meñ utrā kabhī kabhī ḳhanjar

harf ban kar zabān se niklā

daam se bach nikalne vaale kā

kaam ūñchī uḌaan se niklā

mudda.ā ḳhāmushī meñ rahtā hai

mudda.ā kab zabān se niklā

raat maiñ Dar gayā kitāboñ se

jaane kyā dāstān se niklā

raat kā dard kis ne samjhā hai

din isī aan baan se niklā

jab nasheb-o-farāz ne rokā

rāsta darmiyān se niklā

pūchhiye qurq karne vāloñ se

kyā milā kyā makān se niklā

baḌh ke dastak jo dī ujāloñ ne

ek saaya makān se niklā

muddaa kya zaban se nikla

tir tha jo kaman se nikla

dil mein utra kabhi kabhi KHanjar

harf ban kar zaban se nikla

dam se bach nikalne wale ka

kaam unchi uDan se nikla

muddaa KHamushi mein rahta hai

muddaa kab zaban se nikla

raat main Dar gaya kitabon se

jaane kya dastan se nikla

raat ka dard kis ne samjha hai

din isi aan ban se nikla

jab nasheb-o-faraaz ne roka

rasta darmiyan se nikla

puchhiye qurq karne walon se

kya mila kya makan se nikla

baDh ke dastak jo di ujalon ne

ek saya makan se nikla