مدت ہوئی طوفان بلا خیز کو گزرے

مدت ہوئی طوفان بلا خیز کو گزرے

کچھ لوگ ہیں اب تک جو نکلتے نہیں گھر سے

سن کر مری دیوانگیٔ عشق کے چرچے

یہ عقل کے بندے مرے ہم راہ نہ ٹھہرے

ہوں خوفزدہ تیرگیٔ ذہن سے گھر میں

اور گھر سے نکلتا ہوں تو ڈستے ہیں اجالے

یہ تشنگی بن جائے نہ ہنگامے کا باعث

بیٹھے ہیں قدح خوار بڑی دیر سے پیاسے

اے اہل جہاں تم سے مسیحائی نہ ہوگی

یہ زخم نہ بھر پائیں گے یہ زخم ہیں گہرے

ڈر ہے کہ نہ بن جاؤ کہیں خود ہی تماشہ

ہم اہل محبت کے نہ تم دیکھو تماشے

یہ عشق تو خوددار بناتا ہے بشر کو

باسطؔ وہ نہیں عشق جو پندار مٹا دے