muddat hui tufan-e-bala-KHez ko guzre

muddat huī tūfān-e-balā-ḳhez ko guzre

kuchh log haiñ ab tak jo nikalte nahīñ ghar se

sun kar mirī dīvāngī-e-'ishq ke charche

ye 'aql ke bande mire hamrāh na Thahre

huuñ ḳhaufzada tīrgī-e-zehn se ghar meñ

aur ghar se nikaltā huuñ to Daste haiñ ujāle

ye tishnagī ban jaa.e na hangāme kā bā'is

baiThe haiñ qadah-ḳhvār baḌī der se pyāse

ai ahl-e-jahāñ tum se masīhā.ī na hogī

ye zaḳhm na bhar pā.eñge ye zaḳhm haiñ gahre

Dar hai ki na ban jaao kahīñ ḳhud hī tamāsha

ham ahl-e-mohabbat ke na tum dekho tamāshe

ye 'ishq to ḳhud.dār banātā hai bashar ko

'bāsit' vo nahīñ 'ishq jo pindār miTā de

muddat hui tufan-e-bala-KHez ko guzre

kuchh log hain ab tak jo nikalte nahin ghar se

sun kar meri diwangi-e-'ishq ke charche

ye 'aql ke bande mere hamrah na Thahre

hun KHaufzada tirgi-e-zehn se ghar mein

aur ghar se nikalta hun to Daste hain ujale

ye tishnagi ban jae na hangame ka ba'is

baiThe hain qadah-KHwar baDi der se pyase

ai ahl-e-jahan tum se masihai na hogi

ye zaKHm na bhar paenge ye zaKHm hain gahre

Dar hai ki na ban jao kahin KHud hi tamasha

hum ahl-e-mohabbat ke na tum dekho tamashe

ye 'ishq to KHuddar banata hai bashar ko

'basit' wo nahin 'ishq jo pindar miTa de