muddat ke baad soch mein ghaltan hua to kya

muddat ke baad soch meñ ġhaltāñ huā to kyā

apne kiye pe aap hī hairāñ huā to kyā

ik pās-e-rasm thā jise ham ne nibhā diyā

ab vo kiye pe apne pashemāñ huā to kyā

ye sab adā.eñ husn kī haiñ ishq ke liye

kitnā hī pur-fusūñ ruḳh-e-ḳhūbāñ huā to kyā

ye husn-e-sañg bhī but-e-zebā ke dam se hai

nīlam huā to kyā koī marjāñ huā to kyā

kuchh aur bhī hasīn hai ḳhvāboñ kī dhuñd meñ

zāhir huā to kyā koī pinhāñ huā to kyā

hasrat hai shahr-e-yār meñ marnā nasīb ho

jagmag huā to kyā huā vīrāñ huā to kyā

muddat ke baad soch mein ghaltan hua to kya

apne kiye pe aap hi hairan hua to kya

ek pas-e-rasm tha jise hum ne nibha diya

ab wo kiye pe apne pasheman hua to kya

ye sab adaen husn ki hain ishq ke liye

kitna hi pur-fusun ruKH-e-KHuban hua to kya

ye husn-e-sang bhi but-e-zeba ke dam se hai

nilam hua to kya koi marjaan hua to kya

kuchh aur bhi hasin hai KHwabon ki dhund mein

zahir hua to kya koi pinhan hua to kya

hasrat hai shahr-e-yar mein marna nasib ho

jagmag hua to kya hua viran hua to kya